Pas mesnate, Shqipëria ka pritur avionin e parë me 121 qytetarë afganë, midis të cilëve janë edhe 11 foshnja.
Avioni u ul pak pas orës 4 të mëngjesit në aeroportin e Rinasit, ndërsa qytetarët janë mirëpritur nga Ministrja për Evropën dhe Punët e Jashtme Olta Xhaçka, ambasadorja e SHBA, Yuri Kim, drejtues të FA dhe policisë së shtetit.
Refugjatët afganë u pritën në qendrën e pritjes së përkohshme, ngritur në zonën ushtarake. Qendra e pritjes së përkohshme është inspektuar nga Ministrja Xhaçka e cila ka vlerësuar kontributin e efektivë të FA, policisë së shtetit, policisë kufitare dhe mjekëve e infermierëve.
Më pas ata do të nisen drejt strukturave të hotelerive në qytetin e Durrësit.
Kujtojmë se prej më shumë se dy javësh, në vendin tonë pritej që të vinin refugjatët afganë, pasi talebanët morën pushtetin në Afganistan.
Kryeministri Edi Rama ka deklaruar në intervista të ndryshme se Shqipëria do të strehojë përkohësisht rreth 4 mijë refugjatë, ndërsa është shprehur se kush dëshiron mund të qëndrojë përgjithmonë në Shqipëri.
Situata në Afganistan pas marrjes së Kabulit nga talebanët nuk paraqitet aspak e mirë. Vetëm mbrëmjen e djeshme janë regjistruar disa shpërthime të fuqishme ku disa persona kanë mbetur të vdekur dhe disa të tjerë të plagosur.
