Stresi mbajti anën e Noizy-t në sherrin viral me Cllevio-n. Arkimed Lushaj dhe Kleviol Ahmetaj janë miq prej shumë vitesh, mirëpo në sherrin dhe më pas ofendimet e Cllevio-s në TikTok për Rigels Rajkun, Stresi zgjodhi këtë të fundit me arsyetimin se Klevioli po bën shumë gabim.
Së fundmi në një intervistë për “Prive”, Stresi foli për shumëçka, ndër to edhe Cllevio-n.
“Ai është një djalë shumë i mirë. Ka një familje të mrekullueshme, nuk e keni idenë çfarë familje ka ai djalë. Djali ka nevojë për mbështetjen tonë gjithmonë. Për sa i përket këtyre budalliqeve që ndodhin janë gjëra të momentit. Ngjarje që duhet t’i lëmë pas krahëve se kemi një shoqëri prej 20 viteve. Unë e dua fort, e përshëndes atje ku është dhe i them më qetë”,-u shpreh reperi.
“Ai është një talent, i duhet që të ec para me muzikën dhe jo të merret me live-t. Mos harro kush kemi qenë”, vazhdoi Stresi.
I ngecur mes të dyve, Arkimedi është pyetur edhe në lidhje me ndonjë ndërmjetësim midis Noizy-t dhe Cllevio-s. Edhe për këtë pjesë Stresi nuk ka nguruar të përgjigjet.
“Çdo gjë që po e bën është duke e bërë gabim, por janë gabime që i falen çdokujt, çdo shokut se kemi një njohje prej 20 viteve, nuk janë pak. Mesazhi im për të është të jetë me këmbë në tokë, të gjithë kemi bërë gabime por kemi qenë në një moshë më të vogël jo tani.
Kemi ndikuar maksimalisht, jo vetëm unë por shumë artista. Është e pamundur që të zgjedhim këtë temë, është e pamundur. Mendoj se koha shëron çdo gjë dhe e ka vërtetuar se koha mbyll çdo plagë”, -përfundon Lushaj.
