Vetëm pak momente më parë, maturantët kanë përmbyllur protestën para Ministrisë së Arsimit, në të cilën kanë kërkuar zgjidhje për problematikat e testit të Letërsisë dhe Gjuhës Shqipe, që sipas tyre ishte i pasaktë dhe nuk përputhej me përgatitjen që ata kanë bërë gjatë 3 viteve të gjimnazit.
Ata kanë protestuar për dy orë përpara ministrisë në kryeqytet, e po ashtu dhe në qytete të tjera e mesa duket ka pasur një reagim. Komiteti i Maturës Shtetërore ka reaguar së fundmi duke bërë të ditur se do të ketë një rishikim të shpërndarjes së notave sipas pikëve.
“Komiteti i Maturës Shtetërore 2020 (KOMSH), që në ditën e parë pas provimit të Gjuhës shqipe dhe Letërsisë, ka vlerësuar me kujdes reagimet e maturantëve dhe të mësuesve të tyre, si dhe kërkesat adresuar Ministrisë së Arsimit, Sportit dhe Rinisë, duke synuar mundësitë e zgjidhjes së tyre pa ndikuar në procesin e Maturës Shtetërore.
Në komunikim me mësues të gjuhës shqipe dhe letërsisë dhe në bashkëpunim me Qendrën e Shërbimeve Arsimore (QSHA) është gjykuar që të rishihet mënyra e shpërndarjes së notave sipas pikëve të marra nga maturantët në test, për të shmangur shqetësimin e maturantëve mbi notat e tyre, gjë që ka efekt të njëjtë për të gjithë ata. Kjo do të bëhet vetëm pasi të kemi rezultatin e pikëve të marra nga maturantët.
QSHA do të publikojë që sot testin e plotë dhe për çdo pyetje përgjigjen e saktë, në mënyrë që çdo maturant duke u konsultuar me to, të mund të bëjë një vetëvlerësim të asaj çka ai është përgjigjur në test.
Menjëherë sapo të dalin rezultatet, maturantët krahas notës së tyre do të kenë dhe variantin që kanë pasur në provim me alternativën e saktë.
Maturantët duhet të jenë të qartë dhe të bindur se puna e tyre në tri vitet e gjimnazit, si dhe puna e mësuesve, do të vlerësohet me objektivitet, duke iu garantuar se personalizimi i testit nuk sjell asnjë ndikim në vlerësimin e tyre.
Duke vlerësuar çdo koment apo sugjerim të dhënë në këto ditë në media apo rrjete sociale nga ekspertë të fushës, si dhe nga mësuesit, të cilët njohin nga afër programin dhe nivelin e nxënësve të tyre, i ftojmë ata që sot në një tryezë për të diskutuar konkretisht mbi cilësinë e pyetjeve të testit dhe përputhjen e tyre me programet orientuese të Gjuhës shqipe dhe Letërsisë, ashtu siç ka garantuar QSHA-ja.”-shkruhet në postimin e Ministrisë së Arsimit në Facebook.
REAGIM I KOMSH – KOMITETI I MATURËS SHTETËRORE 2020
Komiteti i Maturës Shtetërore 2020 (KOMSH), që në ditën e parë pas…
Posted by Ministria e Arsimit, Sportit dhe Rinisë on Sunday, 14 June 2020
Gjithahstu, është bërë e ditur se provimi i Matematikës që do të mbahet ditën e nesërme do të ketë një shtesë prej 30 minutash në dispozicion të nxënësve për të dhënë maksimumin në plotësimin e tyre.
Maturantët më parë kishin deklaruar se nëse nuk do të merreshin parasysh kërkesat e tyre do ta bojkotonin testin e Matematikës. Sot, në përfundim të protestës, ata kanë deklaruar se nuk do ta bëjnë një gjë të tillë.
