Një shqiptar nga Maqedonia mbrëmjen e kaluar kontaktoi me emisionin “Pa Gjurmë” dhe kërkoi para me pretendimin se di vendndodhjen e Bleona Matës, e cila ka humbur pasditen e 22 majit të vitit 2010, teksa kulloste bagëtitë në malin e fshatit Zapod të Kukësit.
Siç pohoi moderatorja e emisionit, Mehmet Xheladini para dy viteve i ka dhënë nënës së Bleonës dy foto që ishin realizuar në Londër kundrejt një shume prej 600 eurosh.
Ndërkohë paraditen e sotme ai ka kontaktuar sërish me moderatoren dhe ka kërkuar ndjesë publike.
“Unë kërkoj falje, më vjen shumë keq. Kam qenë në gjendje shumë të keqe dhe prandaj e kam bërë atë veprim. Unë nuk kam asnjë lidhje me Bleonën. Jam penduar shumë, gjithçka e kam bërë vetëm për lekë. Në atë kohë kam pasur probleme, jam marrë me drogë dhe prandaj e kam bërë, vetëm për lekë. Me të vërtetë unë kërkoj shumë falje. Unë zonjës Bukurie i kam borxh jetën. Le të më tregojë llogarinë, do ia kthej lekët vetëm që kjo çështje të përfundojë dhe mos të më denoncojë në polici”, ka deklaruar publikisht Xheladini.
