Sot nisi aplikimi i rregullave të reja në Tiranë, që do të disiplinojnë sjelljen e qytetarëve gjatë blerjes në tregjet ushqimore, duke respektuar distancën.
Ministri i Brendshëm Sandër Lleshaj tha nga Lezha ku ishte për inspektim se nga e marta, rregullat e reja do të shtrihen në të gjithë vendin.
Kryesorja sipas tij është respektimi i distancës fizike nga njëri qytetar te tjetri. Lleshaj theksoi gjithashtu se sot nuk është koha për t’i repsektuar sipas traditave të afërmit tanë që ndërrojnë jetë.
“Duke filluar nga nesër në gjithë vendin do të aplikohen standarde të reja për tregjet ushqimore të hapura me qëllim të ruhet distanca. Gjej rastin t’i apeloj qytetarëve të kujdesen në maksimum për vetveten. Fatkeqësisht edhe në Lezhë pati një shpërthim të papritur”, tha Lleshaj.
“Nuk është koha për të respektuar edhe të vdekurit ashtu siç e meritojmë. Jemi në një kohë të jashtëzakonshme dhe mesazhi im për të gjithë është që të bëjmë maksimumin për ta kapërcyer këtë kohë. Kush s’ka punë të rrijë në shtëpi. Nuk është kohë për të bërë muhabete”, vijoi ministri.
Në Tiranë u vu në funksion tuneli dezinfektues, dhe hyrja me një kalim në tregje, që krijoi një ambient më të sigurt për të gjithë blerësit. Kryeministri Rama u shpreh se vetëm disiplina do t’i hapë rrugë lehtësimit me pikatore të masave të lëvizjes.
