Ditën e djeshme Komiteti Teknik i Ekspertëve vendosi që të mos merrte asnjë masë tjetër kufizuese në lidhje me pandeminë. Duke parë zhvillimin e situatës, Komiteti i Ekspertëve vendosi që të qëndrojnë në fuqi të njëjtat masa, ora policore nga ora 20:00-06:00 dhe mësimi online në gjimnaze.
“Duket se situata në vend është delikate një situatë që meriton vëmendje por duket se nga shifrat kemi një situatë të qëndrueshme dhe në ditët e fundit ka një tendencë ulje të indikatorit R nga 1.1 në 1.05. Masat që u propozuan para dy javësh kanë dhënë efekt. Ne do të vijojmë të mbetemi aty duke i vlerësuar ngushtësisht në kohë të shkurtër. Pra në masat që vazhdojnë të mbeten në fuqi, është kufizimi i lëvizjes së qytetarëve në orën 20:00, mësim online në gjimnaze”, tha Mira Rakacolli.
Mirëpo duket se këto masa do të rishikohen dhe shefja e Departamentit të Sëmundjeve Infektive në Institutin e Shëndetit Publik, Silva Bino, nuk e përjashtoi faktin që mund të kemi shtrëngim masash në fillim të javës së ardhshme.
“Në fund të javës dhe të hënën tjetër ne do të shikojmë se si po ecën gradualisht situata dhe do të merren masan përkatëse sipas evoluimit të pandemisë”, tha Bino ditën e sotme.
Ajo u shpreh se shifrat e të infektuarve, numri i atyre që kërkojnë ndihmë në spitale dhe humbjet e jetëve, duhet të shërbejnë si një kambanë alarmi.
“Me rëndësi është që të gjithë njerëzit të evitojnë grumbullimet, të mbajnë maskën, të mos ulen shpesh në kafene apo lokale në mënyrë të grumbulluar, pasi janë vende të burimit të infeksionit. Është një situatë serioze, pasi numri i lartë i rasteve, i të shtruarve në spitale të cilët mund të përfundojnë në intubim, janë një kambanë alarmi dhe shqetësuese”, tha Bino.
