Lulzim Cuku, 45-vjeçari i cili një ditë më parë (e dielë 2 shkurt) vrau bashkëshorten e tij Manjola Cukun, ka rrëfyer krimin para oficerëve të policisë.
Ai është shprehur se kishte dyshime se gruaja e tradhtonte dhe në debat e sipër ka marrë thikën dhe e ka qëlluar tre herë.
Si pasojë e plagëve të marra, 33-vjeçarja, nënë e tre fëmijëve ka gjetur vdekjen e menjëhershme.
“Më dukej se më tradhtonte. Nuk kisha ndonjë informacion të veçantë, por meqenëse ikja shpesh në Greqi mendoja se gjatë kohës që mungoja në shtëpi ajo më tradhtonte”, ka thënë Lulzim Cuku.
Sipas dëshmisë së Lulzim Cukut, të shtunën në mbrëmje atë e kishte “pushtuar” një krizë xhelozie dhe më pas kishte marrë thikën dhe kishte qëlluar bashkëshorten.
Pas këtij krimi 45-vjeçari u largua drejt Dibrës për t’ju shmangur policisë, por pas disa orëve u pendua dhe u vetëdorëzua në policinë e Burrelit.
Dëshmia e plotë
“Jam penduar shumë për veprimin tim. Nuk duhet të kishte ndodhur kjo, nuk duhet të kisha qëlluar mbi Manjolën. Fëmijët e mi ngelën rrugëve tani. Jam shumë i dëshpëruar. Tentova disa herë të vetëvritesha, por nuk ia dola. Sherri i fundit ndodhi pasi prej kohësh kishim debate. Kisha dyshime se ajo fuste njerëz të tjerë në shtëpinë tonë, ndërkohë që unë isha në Greqi. E kishte kthyer shtëpinë në shtëpi publike, fuste brenda lloj-lloj njerëzish aty. I kërkova të mos e bënte më këtë veprim, por sapo unë ikja në Greqi, më thoshin njerëzit se ajo vazhdonte të fuste njerëz të panjohur në shtëpi. Për këtë arsye u ktheva nga Greqia. Gjatë kësaj kohe debatonim shpesh. Mbrëmë (parmbrëmë) situata doli jashtë kontrollit dhe unë e qëllova me thikë. Nuk mendova se ka vdekur, pasi e lashë të shtrirë në tokë. Nga mediat e dëgjova që kishte ndërruar jetë. Më vjen shumë keq, sidomos për fëmijët që mbetën në mëshirë të fatit”, ka deklaruar për hetuesit e Policisë 45-vjeçari./gazetareforma
