Në emisionin “Repolitix” në “Report TV” është publikuar mbrëmjen e sotme, video e përplasjes me armë në zonën e ish-Bllokut, me 4 tetor 2018, ku mbeti i vrarë Fabiol Gaxha dhe u plagos Ervis Martinaj dhe Eljon Hato.
Në orën 21:27 minuta, shihet qartë sesi Ervis Martinaj, Eljon Hato, Redi Popesku dhe një tjetër person i paidentifikuar hyjnë brenda lokalit Monopol. Më pas, edhe dy miq të tjerë të Martinaj, përfshirë këtu edhe Fabiol Gaxhën që mbeti i vrarë, futen brenda.
Në orën 21:23 e 30 sekonda, shihet qartë sesi persona që ndodheshin brenda lokalit, largohen të friksuar, pasi siç dallohet edhe nga video nis sherri me grushta. Sipas “Report TV”, në këtë moment përplasen fizikisht Ervin Mata me Ervis Martinaj, Fabiol Gaxha dhe Eljon Hato me komandon Mervjol Bilo. Të shtënat e para janë dëgjuar në orën 21:29 minuta e 30 sekonda, ku nga video shihet që komandoja Mervjol Bilo qëllon mbi Fabiol Gaxhën, Eljon Haton dhe Ervis Martinaj.
Të parët që dalin nga lokali Monopol janë Mervjol Bilo, Ervin Mata, i dashuri i Elvana Gjatës, Geldo Hoti dhe një tjetër person, i cili nuk dallohet qartësisht.
Pas tyre, del edhe pronari i lokalit Redi Popesku si dhe Ervis Martinaj, i cili është plagosur në qafë dhe dorën e ka të gjakosur.
Pas të shtënave shihet që Eljon Hato është i plagosur rëndë dhe kërkon ndihmë. Një shok i tij është afruar dhe e ka marrë në krah për ta çuar në spital. Hato mban një telefon në dorë dhe dallohet që nuk është në gjendje të ecë.
Kjo video tregon se përplasja me armë në ish-bllok nuk ka ndodhur pas një takimi të Ervis Martinaj dhe Ervin Matës, por grupi i Ervis Martinajt ka hyrë brenda lokalit dhe menjëherë ka nisur sherri.
