Turqia po përballet me një ngjarje të rëndë që ka tronditur opinionin publik, pas një sulmi me armë në shkollën “Ayser Çalık” në Kahramanmaraş, ku humbën jetën 9 persona, mes tyre mësuesja Ayla Kara dhe 8 nxënës. Hetimet kanë zbuluar se autori i dyshuar është një 14-vjeçar, i cili dyshohet se ka hapur zjarr brenda ambienteve të shkollës.
Sipas dëshmive të të mbijetuarve, sulmi ka ndodhur papritur gjatë orës mësimore, duke shkaktuar panik dhe kaos në klasë. Një nga nxënëset e mbijetuara, Fatma İkra Çam, ka treguar momentet e tmerrit që përjetoi, duke thënë se shoqja e saj u bë mburojë për ta shpëtuar nga plumbat.
Ajo rrëfen se autori ka hyrë në klasë dhe ka thënë: “Nuk keni shpëtim”, para se të hapte zjarr ndaj nxënësve. E plagosur në këmbë, ajo arriti të shpëtonte duke u hedhur nga dritarja, ndërsa të tjerë u përpoqën të ndiqnin të njëjtën rrugë shpëtimi.
Nxënësja ka treguar gjithashtu për humbjen e shoqes së saj të ngushtë dhe dhimbjen që po përjeton pas ngjarjes, duke thënë se nuk arrin të kthehet në normalitet për shkak të traumës së rëndë.
Në mesin e viktimave është edhe mësuesja e matematikës, Ayla Kara, e cila sipas dëshmive të familjarëve u përpoq të mbronte nxënësit deri në momentin e fundit.
Autoritetet turke po hetojnë rrethanat e ngjarjes, përfshirë edhe dyshimet për ndikime online dhe përfshirjen e mundshme të grupeve ekstremiste në rrjetet sociale. Hetimet vijojnë për të zbardhur plotësisht këtë sulm tragjik.
