Mbrëmjen e 17 tetorit, një shpërthim shkatërroi një pjesë të spitalit Al-Ahli në qytetin e Gazës.
Sipas Ministrisë së Shëndetësisë të qeverisë së Rripit të Gazës, e udhëhequr nga Hamasi, të vdekurit janë mbi 500, por numri i saktë i viktimave po përditësohet vazhdimisht.
Hamasi akuzoi Izraelin për sulmin ndaj spitalit, duke e quajtur atë një “krim gjenocidi”, por Jeruzalemi tha se një breshëri raketash e gabuar nga grupi i Xhihadit Islamik Palestinez ishte përgjegjës për shpërthimin.
Megjithatë, për momentin nuk ka qëndrime zyrtare për çështjen e ushtrisë.
Fotot dhe videot nga spitali tregojnë skena të tmerrshme, me qindra trupa të shtrirë në tokë, të ndriçuar nga pishtarët në natën e errët të Rripit të Gazës, i cili prej ditësh ka mbetur pa energji elektrike.
Sakaq bota arabe ka shpërthyer në protesta pas sulmit makabër, ku me mijëra njerëz u mblodhën rreth ambasadave izraelite në Turqi dhe Jordani, ndërsa në Liban njerëzit u grumbulluan rreth ambasadës amerikane.
Presidenti i Autoritetit Kombëtar Palestinez, Abu Mazen shpalli zi kombëtare treditore, duke folur për “gjenocid” dhe një “katastrofë humanitare” dhe anuloi takimin me presidentin amerikan Joe Biden të parashikuar për sot.
