Një valë e rëndë dhune ka tronditur Hondurasin, ku të paktën 19 punëtorë fermash janë vrarë në një masakër të ndodhur në veri të vendit, ndërsa katër efektivë policie kanë humbur jetën në një tjetër incident të armatosur në një zonë të veçantë.
Ngjarja më e rëndë është regjistruar gjatë natës në fshatin Rigores, pranë qytetit Trujillo, një zonë që sipas autoriteteve ndodhet nën ndikimin e organizatave kriminale të përfshira në konfliktet për kontrollin e tokave dhe shfrytëzimin e plantacioneve të palmave. Zëdhënësi i prokurorisë, Yuri Mora, bëri të ditur se viktimat janë gjetur në dy lokacione të ndryshme, me 13 trupa në një vend dhe gjashtë në një tjetër.
Autoritetet dyshojnë se bëhet fjalë për ekzekutime me armë të kalibrit të rëndë, ndërsa pamje të publikuara nga mediat lokale tregojnë trupa të shpërndarë në fushat e zonës. Ministri i Sigurisë, Kherson Velasquez, deklaroi se ngjarja përbën një nga aktet më të rënda të dhunës në rajon.
JUEVES SANGRIENTO EN HONDURAS. pic.twitter.com/8zpHeq1RmY
— ᴊᴏꜱᴛʀᴀᴄᴋHN 🇭🇳 (@JostrackHN) May 21, 2026
Në një incident të veçantë në Omoa, pranë kufirit me Guatemalën, katër policë dhe një civil u vranë gjatë një shkëmbimi zjarri me persona të dyshuar si trafikantë droge.
Pas këtyre zhvillimeve, qeveria ka urdhëruar dislokimin e forcave shtesë policore dhe ushtarake në zonat e prekura, ndërsa situata mbetet e tensionuar. Dhuna vjen në një moment kur autoritetet kanë forcuar ligjet kundër krimit të organizuar në vend.
