Sot ka qenë një ditë martesash hollivudiane: Jude Law u martua në fshehtësi me partneren Phillipa Coan (shiko këtu), këngëtari Joe Jonas i Jonas Brothers u martua me aktoren e “Game of Thrones” Sophie Turner në Las Vegas (shiko këtu) dhe tashmë, është radha e një tjetër martese të pazakontë.
Me tuta u bë i famshëm, me tuta u martua.
Këngëtari i hitit “Human”, Rag’n’bone Man, emri i vërtetë i të cilit është Rory Graham, vuri sot kurorë me partneren e tij Beth Rouy, të veshur të dy me kostume sportive.
Megjithëse duket sikur i ka rënë shkurt për të shmangur stresin e zgjedhjes së vellos së nusërisë, në fakt kostumi i nuses nuk është pa gjë.
Është i tëri i printuar me fytyrën e maces së tyre të racës sfinks, Patricia. Dhe jo vetëm kaq: kostumi i personalizuar ka të printuar edhe inicialet e çiftit “R” dhe “B”, si edhe datën 4 maj 2019, që duket se do të shënojë ceremoninë e madhe.
Madje, edhe për të ftuarit, njerëz të afërt të çiftit, kodi i veshjes ishte po i njëjti: kostum sportiv, ose mos hajde fare.
Martesa u bë në gjendjen civile të qytezës Leëes, në Britaninë e Madhe.
Rory dhe Beth kanë një histori të gjatë dashurie prej plot 9 vitesh bashkë dhe vitin e kaluar, ata u bënë për herë të parë prindër të një djali, të cilin e quajtën Reuben.
