Marrëdhënia nuse vjehrrë gjithmonë ka hapësirë për diskutim. Në shumicën e rasteve kjo është një marrëdhënie që lë për të dëshiruar, e askush nuk mund të flasë se gjërat shkojnë mirë mes një nuse dhe vjehrre që në ditën e parë.
Përgjithësisht ky problem nuk shtrohet midis nuses dhe vjehrrit, sepse studimet psikologjike kanë treguar se natyra mashkullore është më pranuese ndaj njerëzve të rinj në jetën e tyre.
Ndërsa vjehrrat, mendojnë se nusja u ka marrë dashurinë e të birit të tyre dhe duket sikur nxjerrin kthetrat që në momentin e parë për t’i treguar nuses se ato vazhdojnë të jenë mamatë e djemve të tyre dhe sërish do vazhdohet të bëhet siç thonë ato.
Marrëdhënia mes tyre ndryshe mund të quhet si një lojë nervash dhe në fund del e fituar ajo që duron më shumë.
Këshillat:
Mos e shihni vjehrrën si një person tërësisht negativ, që ka vendosur vetëm t’ju acarojë. Ju mund ta fitoni zemrën e saj me disa detaje shumë të vogla.
Së pari, mos mendoni se ajo është vjehrra juaj, por mendoni se është mamaja e bashkëshortit tuaj dhe nëse ai ju do dhe ju respekton sot, atë kulturë e ka fituar nga ajo që ti mendon se ka vendosur të të “nxijë jetën”.
Së dyti, edhe kur ajo të flet për diçka që ty nuk të pëlqen (shpesh herë për ish të dashurat e mira dhe të bukura të djalit të saj), pohoje sikur e kupton dhe thuaji se edhe ti do të ndryshosh që t’i biesh asaj në sy për mirë.
Kur ajo të kritikon për gatimin, vlerësoje duke i thënë se nuk e ke moshën e saj dhe se nuk mund të gatuash aq mirë sa ajo.
Duhet të kuptosh se nuk mjafton vetëm të investosh në marrëdhënien me bashkëshortin tënd, por edhe me prindërit e tij.
