Çdo person në këtë planet ka qime në trup, kudo në trup ose në vende të ndryshme. Është diçka që zhvillojmë gjatë pubertetit. Nga perspektiva e evolucionit, qimet kanë një funksion biologjik. Ato ndihmojnë trupin të mbrohet nga sëmundje të ndryshme. Në shoqëritë moderne, më të pastra dhe të kujdesura ndaj higjienës, nuk është më e nevojshme të mbrohemi nëpërmjet tyre. Përpos kësaj media, që ka një ndikim të madh në jetët tona, promovon heqjen e qimeve në zona ku burrat nuk duhen patjetër ta bëjnë.
Në fakt ka një obsesion shumë të madh me depilimin. Mund ta gjejmë në kohët e kaluara kur burrat lakmonin vajza të virgjëra dhe para pubertetit, mund ta gjejmë dhe në vitet ’80 kur porno aktoret filluan të depiloheshin në mënyrë që aksioni të dukej më mirë. Kjo gjithashtu lidhet më një tjetër obsesion që kemi, rininë. Sepse në realitet një vaginë pa qime është një vaginë e re dhe deri diku pak fëminore, larg plakjes. Është e rëndësishme të dimë këtë kur vendosim se çfarë do bëjmë aty poshtë. Zgjedhja është shumë personale, dhe ka të bëjë pikërisht me shijet personale, pra është një vendim që duhët të marrësh vetëm ti. Nëse do të rruhesh, depilohesh me dyll, me sheqer, me krem apo me lazer, është zgjedhja jote. Nëse do të rrisësh një shkurre të vogël apo të krijosh një rrip elegant dhe ajo gjithashtu është zgjedhja jote. Mos u tremb nga presioni i një shoqërie super të seksualizuar, në të cilën jetojmë të gjithë.
Në përgjithësi jemi një shoqëri që ka frikë nga anatomia e vet. Jemi një shoqëri që mundohet t’i përshtatet normave dhe rregullave, që të jetë e pranuar. Qimet publike nuk janë të shpifura ndonëse jemi të programuar të mendojmë kështu ( padyshim jo të gjithë).
Duke nisur nga vetja, pranoj që depilohem me dyllë, dhe kjo mund të duket hipokrite dhe patetike duke parë që deri tani dhashë leksione se si duhet të kemi kujdes nga plazmimi që na bën shoqëria. Por, unë jam gjithashtu pjesë e kësaj shoqërie, dhe në nënvetëdijen time, jam kanalizuar drejt këtij procesi. Gjithmonë jam depiluar. I urrej qimet.
Por, duke vënë pak në veprim mendimin kritik, mbas heqjes së qimeve të grave, qëndron gjithashtu një industri e madhe. Ka lloj, lloj produktesh që përdoren mbas depilimit në mënyrë që qimet të rriten më ngadalë. Ka depilim me dyll e me sheqer. Ka depilim me krem për kushte shtëpie, dhe më e shtrenjta nga të gjitha, lazeri. Çdo vit duket sikur ky sektor zhvillohet me lloj lloj metodash per largimin e qimeve apo pushit të tepërt, duke u dukur sikur nuk ke pasur qime kurrë. Morali i këtij posti është që në fund të ditës, qimet janë natyrale dhe nuk duhet të kesh turp prej tyre apo prej trupit tënd. Nga ana tjetër kuptoj mirë botën në të cilën jetojmë, dhe presionin të cilin e ndjejmë çdo ditë, sidomos kur bëhet fjalë për trupin, sidomos nëse je grua.
Nëse nuk do të depilohesh, është shumë në rregull. Nëse depilohesh është gjithashtu shumë ok. Thjeshtë sigurohu që të kryesh këto veprime për vete dhe jo sepse të tjerët duan.
Jam shumë e vetëdijshme që në çdo fazë të jetës ka presione për të arritur një standart të caktuar. Është e lehtë për djemtë apo burrat të thonë që është shumë e shpifur kur ata e kanë shumë më të lehtë. Vetëm nëpërmjet edukimit dhe komunikimit mund të eliminojmë këto pikëpamje që janë shumë të dëmshme për vetëbesimin e burrave dhe grave. Kur je i/e ri/e nuk ke shumë eksperienca me organet intime të të tjerëve, pastaj me kalimin e kohës kupton që trupat ashtu sikurse pjesët intime kanë forma, ngjyra dhe përbërje të ndryshme, njësoj dhe qimet. Të gjithë jemi të ndryshëm dhe kemi shije të ndryshme. Duhet ta pranojmë këtë dhe veten mbi të gjitha.
Nga Zhaklin Lekatari (tabu.al)
