Ditën e sotme ministrja Ogerta Manastirliu nëpërmjet një komunikimi me qytetarët ka treguar për situatën aktuale të vendit tonë.
Manastirliu tha se ne ndodhemi në mes të luftës me koronavirusin dhe u bëri thirrje qytetarëve të vazhdojnë të respektojnë masat e marra.
Ajo tha se në ditët në vazhdim do të rriten masat për parandalimin e koronavirusit në vend, në mënyrë që armiku të mposhtet sa më shpejt.
Ogerta theksoi se distancimi social është shumë i nevojshëm dhe duhet të vazhdojë të zbatohet.
“Që prej fillimit të epidemisë, Shqipëria ka një kurbë në rritje të moderuar të numrit të të prekurve. Sikundër është fakt se Tirana ka sot disa vatra të reja të përhapjes së infeksionit të shkaktuar nga COVID19. Shkodra ka vatër të re. Po ashtu Fieri, Durrësi, Elbasani dhe Kavaja. Falë masave të distancimit social të ndërmarra nga Qeveria shqiptare, sot kemi një numër të prekurish dhe viktimash nga Covid 19, shumë herë më të vogël, se sa do të kish qenë ky numër, po të mos i kishim marrë këto masa”, tha Manastirliu. Për fat të keq, në ditët e fundit, të gënjyer mbase nga krahasimi i shifrave të Shqipërisë me ato të vendeve të tjera, shumë prej jush do të kenë menduar se, ia hodhëm dhe kësaj lufte. Jo! E kundërta është e vërtetë. Jemi mu në mesin e një beteje që nuk është ndalur në asnjë moment, me një virus që sot, për shkencëtarë dhe mjekë në mbarë botën, ka më shumë të panjohura, se sa të njohura”, u shpreh Manastirliu. Qeveria ka vendosur të forcojë masat, sidomos aty ku ka grumbullime njerëzish. Në tregje do të vendoset një korridor sanitar, për të ruajtur distancimin social, që është e vetmja mënyrë për ta dobësuar këtë virus të rrezikshëm. Një dobësi që të gjithë duhet ta shfrytëzojmë për ta vënë përfund”, tha ministrja e Shëndetësisë.
