Vetëm pak muaj më parë, ata u bënë prindër të vogëlushes Stormy dhe tashmë, Kylie Jenner dhe i dashuri Travis Scott janë gati t’i vënë flakën rrjetit me fotot më “hot” të momentit.
Dyshja ka pozuar për një set fotografik të nxehtë për kopertinën e revistës prestigjioze “GQ”, që është dhe seti i tyre i parë i përbashkët.
Ylli i “Keeping Up With The Kardashians” dukej mahnitëse e veshur me një trupore të zezë, ndërkohë që shihet e ulur në prehërin e Travis Scott. Dyshja ka folur në intervistë për fillimet e lidhjes së tyre dhe Kylie ka zbuluar se ata janë pëlqyer qëkurse janë takuar për herë të parë gjatë festivalit Coachella.
“Coachella ishte ndalesa e parë e turneut të tij. Dhe ai më tha: ‘Unë do vijoj turneun. Çfarë do të bëjmë për këtë?’ Ne dukshëm e pëlqenim njëri-tjetrin, kështu që i thashë: ‘Besoj se do vij me ty.’ Thjesht hipa në autobusin e tij dhe udhëtuam drejt perëndimit. Ndenja me të gjatë gjithë turneut.”-rrëfeu Kylie Jenner.
Sakaq ajo ka folur edhe për “mallkimin” e famshëm të motrave Kardashian dhe romancave të tyre. Kylie shpjegon se zakonisht meshkujt që ato kanë në krah nuk e përballojnë dot të gjithë presionin e famës që i rrethon ato, ndaj dhe përfundojnë duke u larguar. Megjithatë ajo sqaron se e gjithë kjo famë Travis-it nuk i pëlqen ndaj secili përpiqet që t’i japë hapësirë tjetrit për të bërë gjërat që ata dëshirojnë.
