Një ngjarje e rëndë ka tronditur Italinë, ku një 25-vjeçare u arrestua me akuzën për mbytjen e tre foshnjave të saj. Dy prej tyre u gjetën të fshehura në një dollap në shtëpinë e saj, ndërsa fëmija i tretë dyshohet se është vrarë në vitin 2022.
Ngjarja u zbulua në korrik 2024, kur nëna e vajzës, duke ndjerë një erë të keqe në shtëpi, kontrolloi dhomën dhe gjeti dy trupat e foshnjave të mbështjellë me batanije. Ajo njoftoi menjëherë policinë, e cila filloi hetimet intensive.
Përmes kamerave të sigurisë u konfirmua se vajza kishte qenë vetëm në shtëpi gjatë kohës kur besohet se kanë lindur dhe janë mbytur dy foshnjat. Hetuesit gjetën prova edhe në një spital në Mesinës, ku gruaja kishte kryer një ndërhyrje pas një gjakderdhjeje të rëndë, ndërkohë që ajo mohoi se ishte shtatzënë.
Nga hetimet doli se çifti kishte pasur një konflikt në vitin 2022 për një shtatzëni të padëshiruar dhe dyshohet se në atë kohë ajo kishte lindur dhe vrarë foshnjën e tretë.
Aktualisht, 25-vjeçarja ndodhet në arrest shtëpie me mbikëqyrje elektronike, ndërsa i dashuri i saj është nën hetim për ndihmë në këto krime. Autoritetet po vazhdojnë hetimet për të zbuluar nëse ka edhe persona të tjerë të përfshirë në këtë rast tragjik.
