Pas më shumë se dy vitesh hetime dhe seanca gjyqësore, Gjykata Themelore e Prizrenit ka shpallur aktgjykimin ndaj Dibran Hoxhës, të njohur me nofkën “Kobra”, dhe bashkëpandehurve të tij, lidhur me ngjarjen tragjike që ndodhi në vitin 2023 në klubin e natës “Cobra City”.
Sipas vendimit të gjykatës, Dibran Hoxha është shpallur fajtor për vrasje dhe armëmbajtje pa leje.
Për veprën e vrasjes ai është dënuar me 23 vite burg, ndërsa për armëmbajtje me 2 vite të tjera, duke iu bashkuar në një dënim unik prej 24 vitesh burgim.
Gjykata ka shpallur fajtorë edhe personat e tjerë të përfshirë në rast:
-Roland Susuri, për tri vepra penale, është dënuar me 7 vite burgim unik – përfshirë 1 vit e 6 muaj për pjesëmarrje në rrahje, 4 vite e 6 muaj për manipulim me prova dhe 1 vit e 6 muaj për armëmbajtje pa leje.
-Arben Vezaj është dënuar me 1 vit burgim për pjesëmarrje në rrahje.
-Burim Mazreku ka marrë 1 vit burg për manipulim me prova.
-Jesmir Badallaj është dënuar me 2 vite burgim unik për pjesëmarrje në rrahje dhe armëmbajtje pa leje.
Vrasja ndodhi në vitin 2023, në ambientet e klubit “Cobra City”, pronë e vetë të akuzuarit Dibran Hoxha. Viktima ishte një shtetas nga Kukësi, dhe ngjarja u pasua me përleshje fizike dhe debate të ashpra që tronditën opinionin publik në Kosovë dhe Shqipëri.
Më 9 shtator 2025, Dibran Hoxha dha versionin e tij të mbrojtjes para trupit gjykues, duke mohuar fajësinë për vrasje të qëllimshme. Megjithatë, gjykata vlerësoi se provat e paraqitura ishin të mjaftueshme për ta shpallur atë fajtor në shkallë të parë. Vendimi pritet të apelohen nga mbrojtja, e cila ka paralajmëruar ankesa ndaj këtij aktgjykimi.
