Të martën në mbrëmje, Maria Grazia Chiuri prezantoi koleksionin e ri të Christian Dior, “Cruise 2020” në një sfilatë të mahnitshme që u mbajt në Marrakech.
Pasarela e madhe ishte vendosur në natyrë me qirinj të ndezur lundrues. Sfilata ishte organizuar jashtë kalendarit të zakonshëm të javës së modës, por dhuroi spektakël për herë të parë në Marok.
Ne do të sjellim sot 5 gjërat që duhet të dimë për këtë sfilatë të paharrueshme të markës më të njohur të modës, që doli jashtë parashikimit.
Sfilata u mbajt në Marrakech
Pas një aventure dy-ditore rreth pallateve të Marrakech, të hënën në mbrëmje Maria Grazia Chiuri ftoi të pranishmit në Palais El Badi për shfaqjen e “Dior Cruise 2020”. Të rrethuara nga kolonat e kështjellës së shekullit të 16-të, modelet sfiluan rreth pishinës epike të oborrit, e ndezur me qindra pishtarë që shkëlqenin mbi sipërfaqe, dhe zjarre gjigante që ndriçonin natën marokene.
Ishte një mesazh për shkëmbinim kulturor
Sfilata u hap me një citat nga shkrimtari maroken Tahar Ben Jelloun: “Kultura na mëson të jetojmë së bashku, na mëson se nuk jemi vetëm në botë, se njerëzit e tjerë kanë tradita dhe mënyra të ndryshme jetese që janë po aq të vlefshme sa tonat “.
Një antropologe u konsultua për krijimin e koleksionit
Maria Grazia Chiuri bashkoi forcat me antropologen franceze Anne Grosfilley, e cila shërbeu si udhërrëfyese gjatë krijimit të koleksionit, me futjen e teknikës së famshme të punës me dorë. Pikëpamja e Maria Grazias ishte të promovonte 100 për qind tekstilin afrikan, por jo për të bërë një stil afrikan. Ky koleksion mund të vishet nga kushdo sepse ka të bëjë me lidhjen mes të gjithë kontinenteve në botë.
Për koleksionin pati shumë bashkëpunime
Duke e përshkruar koleksionin e saj si “një hartë botërore”, Maria Grazia Chiuri ftoi një numër specialistësh për të bashkëpunuar. Ajo punoi me Grosfilley dhe Uniwax për printet e peizazheve apo motiveve. Stilistja britaniko-xhamajkane Grace Wales Bonner dhe artisten afrikano-amerikan Mickalene Thomas ndihmuan për xhaketën klasike të Dior. Chiuri bashkëpunoi edhe me zejtaret marokene Sumano për skenografinë e shfaqjes ku qeramika tradicionale lokale dhe tekstilet u përdorën për dekorin.
Dior ka një lidhje historike me Marrakech
Në vitin 1951, Christian Dior krijoi “Maroc”, një fustan të bardhë prej tyli dhe një pallto me qëndisje argjendi të frymëzuar nga ngjyrat e bardha ftohëse të qytetit. Nën syrin ndër-kulturor të John Galliano-s, i cili punoi për shtëpinë e modës midis viteve 1997 dhe 2011, influencat marokene vazhduan të gjejnë rrugën e tyre në koleksionet e shtëpisë. Por asnjë projektues nuk u afrua më shumë me Marrakech-in sesa Yves Saint Laurent, i lindur në Algjeri, i cili u bë asistent i Dior-it në vitin 1955 dhe më pas arriti të vendosej në krye të shtëpisë së modës. Maria Grazia Chiuri i ftoi të pranishmit të shkonin në vilën Art Deco të Saint Laurent, ku ishte shfaqur fustan i fildishtë ‘Marrakech’ i projektuar për Dior në vitin 1960.
/Vogue
