Presidenti francez Emmanuel Macron dhe bashkëshortja e tij Brigitte ngritën sot një padi për shpifje në Shtetet e Bashkuara kundër influencueses amerikane Candace Owens për promovimin dhe shfrytëzimin e gjerë në video të lajmit të rremë se Brigitte Macron “ka lindur burrë”.
Ky informacion i rremë, i cili u rishfaq shpesh në Francë në mediat sociale pas zgjedhjeve të para të Emmanuel Macron në vitin 2017, qarkulloi gjerësisht jashtë vendit, veçanërisht në SHBA, pasi blogerja e ekstremit të djathtë Candace Owens e shfrytëzoi atë në mars 2024, duke i dhënë jehonë globale që nga janari 2025 përmes një serie videosh të titulluara “Duke u bërë Brigitte“.
Çifti presidencial ngriti sot një padi për shpifje në një gjykatë të Delaware, duke kërkuar një shumë dëmshpërblimi, që do të përcaktohet gjatë gjyqit.
Avokatët e tyre argumentojnë në padi se Candace Owens ishte plotësisht në dijeni të gënjeshtrës së këtyre akuzave dhe refuzoi sistematikisht çdo kërkesë për korrigjim, duke këmbëngulur në “fushatën shpifëse” me qëllim “të fitonte famë dhe të fitonte para”, duke theksuar se ajo aktualisht ka 6.9 milionë ndjekës në llogarinë e saj X dhe 4.7 milionë në YouTube.
Sipas këtij lajmi të rremë, i cili është përhapur gjerësisht në Francë nga teoricienët e konspiracionit, skeptikët e Covid-it dhe madje edhe nga qarqet e ekstremit të djathtë, Brigitte Macron, e lindur Tronier, nuk ka ekzistuar kurrë, por vëllai i saj Jean-Michel e mori këtë identitet pasi ndryshoi gjininë.
Dy gra, Natasha Ray dhe Amadine Roy, të cilat e kishin shpërndarë gjerësisht këtë lajm të rremë, u dënuan në shtator nga gjykatat franceze me pagesën e mijëra eurove kompensim për Brigitte Macron dhe 5,000 eurove për Jean-Michel Tronier, por u liruan nga akuzat në një shkallë të dytë më 10 korrik.
