Mjekët në Francë i kanë hequr aparaturat të riut në koma, që u dhunua në qelinë e paraburgimit në Marsejë të Francës.
Një ditë pasi humbi të birin, vjen reagimi i babait të i 23-vjeçarit, Florenc Beqirit, Gëzim, i cili në një prononcim per Report TV është zotuar se do ta çojë çështjen deri në fund.
Ai ka thënë se ka marre një avokat për ta ndjekur deri në fund çështjen, duke ndarë dhimbjen e madhe për humbjen e të birit që e masakruan në burg, ndërkohë që sipas tij, mjekët i hoqën aparaturat pa e pyetur.
“Kam marrë avokat dhe do t’i shkoj deri në fund kësaj çështje, mjekët i kanë fikur aparaturat pa lejen time. Në këto ditë të vështira janë disa djem shqiptarë në Francë që po më ndihmojnë në çdo drejtim”, u shpreh Beqiraj per Report TV.
I riu nga Shkodra u nda nga jeta mbrëmjen e djeshme, pas masakrimit që i është bërë në qelinë e paraburgimit në Marsejë të Francës. Florenc Beqiraj ra në gjendje kome pas dhunës së ushtruar ndaj tij në burgun francez, ku qëndronte pasi ishte kapur nga autoritetet franceze pa dokumente. Ai ndodhej prej dy vitesh në Francë, prej ku po përpiqej të përfitonte azil, por ka mbyllur sytë përgjithmonë, duke u ndarë nga jeta në një moshë tepër të re.
Lajmi është konfirmuar nga babai i tij i cili ka pasur një komunikim për gazetën. Gëzim Beqiraj, tha se mjekët e spitalit donin t’ia hiqnin tubat, duke shtuar se nuk do të firmoste kurrë për të autorizuar mjekët për një veprim të tillë.
Në një postim në ‘Facebook’ gazetari shqiptar në Francë që komunikoi më Gëzimin, shkruan fjalët që i tha i ati i Florencit:
“Leon ma vranë djalin !!!
Këto ishin fjalët e babait të Florencit, Gëzim Beqiraj që më tha në telefon pak minuta që doktorët francezë i hoqën oksigjenin. Nuk po e besoja dhe menjëherë i drejtova pyetjen: Gëzim çfarë thua? Firmosët Ju që ti hiqnin oksigjenin? Ai i përlotur më thotë: Jo Leon Jo, nuk më pyetën, doktorët ja hoqën oksigjenin pa më pyetur, ma vranë djalin, ma vranë.
Në këto momente mbeta pa fjalë, nuk dija çfarë t’i thosha. Gëzimi vijoi duke më thënë: Mbarova, më vranë djalin tim të vetëm, nuk mund të flas, nuk di çfarë të flas, më vranë djalin Leon, o Zot, o Zot”.
