Sot është dita e fëmijëve. 1 Qershori u është dedikuar të vegjëlve që do të bëhen shumë shpejt e ardhmja e vendit tonë dhe është dita kur ne të rriturit duhet të tregohemi më të vëmendshëm ndaj kushteve në të cilat jetojnë, të drejtave të tyre, por në veçanti në kujdesin dhe dashurinë që u falim.
Më tepër se çdo kush tjetër, kjo ditë është mjaft me rëndësi edhe për fëmijët në nevojë, dhe ata me aftësi të kufizuara, të cilët gjithashtu kanë të drejtë të gëzojnë, dhe jo vetëm në ditë festash.
Ndaj sot Qendra Sociale Multidisiplinare e Bashkisë së Tiranës, mblodhi fëmijët në nevojë për t’u dhuruar sado pak lumturi në këtë ditë festive.
Aktiviteti u organizua falë mbështetjes së Dritan Gremit nga kompania “Viaggiare & Sorridere” dhe fëmijët patën mundësinë që të shijonin ushqime të mira, dhurata të këndshme dhe një atmosferë festive.
Dyqani “Blukids” surprizoi të vegjlit me pako që përmbanin veshje dhuratë të nevojshme për sezonin pranverë-verë. Të vegjlit u thirrën një e nga një për të marrë pakon personale të tyre të 1 Qershorit.
Shefi i njohur italian Loris Marinetto nga restoranti më i ri i hapur në Tiranë me receta fantastike (lexo këtu), gatoi për fëmijët ushqime të shijshme.
Për ta bërë atmosferën edhe më festive, ishin të pranishëm personazhet e filmave vizatimorë të preferuar për fëmijët si, Spiderman apo Elsa e “Frozen”, që shoqëruan dhe u argëtuan me fëmijët në ditën e tyre festive.
Të vegjlit patën mundësi të kërcejnë, të luajnë, të bëjnë foto dhe video me heronjtë e tyre si dhe të pikturojnë, duke kaluar ditën më fantastike.
I pranishëm në aktivitet, drejtori i Qendrës Sociale Multidisiplinare, Rezart Cenaj, tha se gjëja më e mirë që mund të bëjmë ne të rritur është të përmirësojmë jetën e të vegjëlve, duke menduar kështu për të ardhmen e tyre:
“Është një fjalë e urtë që thotë, ‘Më jepni 7 vitet e para të një fëmije dhe ne të themi si do të jetë jeta e këtij njeriu në të ardhmen’. Ne nuk mund të zgjedhim ku dhe kur e fillojmë jetën tonë. Ne mund të zgjedhim sesi të përdorim jetën tonë për të ndihmuar fëmijët në nevojë për të përmirësuar jetën e tyre, është ai momenti kur ne vendosim për një të ardhme të drejtë e të shëndetshme”.
Dhe kur sheh këto copëza të vogla lumturie, ato brohoritje dhe buzëqeshjet e tyre në fytyrë, kupton se dhe me kaq pak mund të bësh të lumtur një fëmijë.
1 Qershori duhet të na kujtojë gjithnjë se duhet të bëjmë më shumë për fëmijët në nevojë dhe të rendim ndaj gjërave që i bëjnë ata të ndihem mirë, për një shoqëri të lumtur dhe të barabartë.
