Historia e kuzhinave mbarë botërore nis me udhëtimin. Dhe nëse udhëtimi do të kishte një shije, padyshim do të shijonte si pjatat e shef Loris Marinetto, të cilat nga dita e djeshme, kushdo në Tiranë do të mund t’i shijojë në restorantin e tij më të ri dhe më intrigues në kryeqytet, të quajtur “Attimi by Loris”.
Dhe ashtu siç sugjeron dhe emri, kuzhina e “Attimi by Loris”, konsiston në momente të udhëtimeve të tij nëpër botë dhe eksperiencave me kuzhinat ndërkombëtare, duke filluar nga ajo italiane me të cilën ai është rritur, e duke vijuar me atë të Japonisë e Amerikës së Jugut që kanë ndikuar më së shumti në punën e tij.
Mbrëmjen e së mërkurës, dhjetra të ftuar në ceremoninë elegante të përurimit të restorantit, patën mundësinë të përfshiheshin në aventurën kulinarike që përfaqëson kuzhina e shef Loris Marinetto, ku shija italiane përqafon kulturat ndërkombëtare për të krijuar kombinime unike që surprizojnë çdo herë shqisat.
Por ndërkohë që festa e djeshme ishte ekskluzivisht për të ftuar të veçantë, tashmë çdo adhurues i kuzhinës së mirë do të mund të shijojë pjatat unike që përgatiten nga duart e shef Loris, me një karrierë që të thuash mbresëlënëse, ke thënë pak (lexo këtu).
Magjia e “Attimi by Loris” fillon që në hapat e parë në brendësi të restorantit. Ambienti i ngrohtë dhe arredimi i menduar me kujdes deri në detajet më të vogla, të krijojnë në mënyrë të menjëhershme një ndjesi privatësie, tipike e restoranteve tradicionale japoneze.
Por këtë ndërthurje kulturash, e realizon në perfeksion detaji dominues në arredim, që evokon tezgjahun, një ndër elementët më të vyer të kulturës shqiptare.
Ashtu sikurse tezgjahu me fijet, në “Attimi by Loris” thuren aromat nepsndjellëse, shijet unike të përbërësve të përzgjedhur me kujdes dhe kompozimet mbresëlënëse të pjatave që ngjasojnë me veprat e artit.
Por nëse shpresoni të shijoni së shpejti mrekullitë që shërbehen në restorantin më të ri në zemër të ish-Bllokut, atëherë bëni mirë të filloni rezervimet, sepse lista me shumë gjasa do të jetë e gjatë…
