Nëse mendoni se në Shqipëri ka më shumë ditë pushimi se në çdo shtet tjetër, atëherë gaboheni! Okej, të gjithë e pranojmë që të punosh në administratën publike këtu është një nga dëshirat e çdokujt, pasi të paktën 2-3 ditë në muaj i ke pushim, ndryshe nga privati që nuk i njeh festat.
Në një hartë të re të përpiluar nga WorldAtlas, rezulton se nga të gjitha vendet në botë, Kamboxhia kryeson listën e festave më të zakonshme, me 28 festat publike të vërejtura çdo vit. Sri Lanka e ndjek me 25, India dhe Kazakistani me 21, Kolumbia, Filipinet, Trinidadi dhe Tobago me 18, Kina dhe Hong Kongu me 17, dhe Tajlanda, Turqia dhe Pakistani me 16.
Shqipëria, sipas të dhënave të vitit 2018, ka në total 13 ditë pushimi zyrtare dhe bën pjesë në grupin më të zakonshëm në botë, sa i përket ditëve pushim.
Në Europë, Shqipëria është ndër ato vende që ka më shumë ditë zyrtare pushimi, pas Malit të Zi. Mali i Zi ka 14 ditë pushimi zyrtare, ndërsa Greqia, Italia dhe Kosova nga 12.
Kjo javë, që duke filluar nga e mërkura është pushim për administratën deri në fund të javës (pasi data 30 është caktuar pushim) është një dëshmi e dy “botëve” të ndryshme ku jeton shteti dhe biznesi.
Ky është kalendari i festave zyrtare të 2018-s në Shqipëri (i publikuar nga Banka e Shqipërisë):
1 dhe 2 Janar Festat e Vitit të Ri
14- Mars Dita e Verës
22- Mars Dita e Nevruzit
01 Prill- E diela e Pashkëve Katolike
08 Prill- E diela e Pashkëve Ortodokse
01 Maj- Dita Ndërkombëtare e Punëtorëve
15 Qershor- Dita e Bajramit të Madh
21 Gusht- Dita e Kurban Bajramit
19 Tetor- Dita e Lumturimit të Nënë Terezës
28 Nëntor- Dita Flamurit dhe e Pavarësisë
29 Nëntor- Dita e Çlirimit
08 Dhjetor- Dita Kombëtare e Rinisë
25 Dhjetor- Krishtlindjet
Në rastet kur festat zyrtare bie në ditët e pushimit javor (e shtunë ose e diel), dita e hënë është ditë pushimi.
Data e festave të Kurban Bajramit dhe Bajramit të Madh mund të ndryshojë sipas kalendarit hënor.
