Një gjyqtar në shtetin e Nju Jorkut ka rrëzuar dy akuza për terrorizëm kundër Luigi Mangione, vrasësit të dyshuar të drejtorit ekzekutiv të UnitedHealthcare, Brian Thompson. Megjithatë, gjykatësi Gregory Carro gjatë një seance dëgjimore të martën në mëngjes vendosi që një akuzë për vrasje të shkallës së dytë kundër Mangione mund të qëndronte.
Ai tha se prokurorët nuk kishin arritur të vërtetonin se kishte prova të mjaftueshme për të justifikuar akuzat për vrasje të lidhura me terrorizmin që ata kërkuan kundër Mangiones. Mangione akuzohet për vrasjen e Thompson në një rrugë të ngarkuar në Manhattan në dhjetor të vitit të kaluar. Në një vendim me shkrim, Carro tha se akuzat kundër Mangione nuk përmbushnin përkufizimin e terrorizmit sipas ligjit shtetëror.
Edhe pse prokurorët argumentuan se shkrimet e lëna nga Mangione tregonin një motiv terrorizmi, gjykatësi tha se ato nuk arritën të tregonin se i dyshuari kishte për qëllim të ushtronte presion politik mbi qeverinë ose të terrorizonte popullsinë në përgjithësi – dispozita kyçe të ligjit të terrorizmit të Nju Jorkut, i cili u miratua pas sulmeve të 11 shtatorit 2001.
“Nuk u paraqitën prova që i pandehuri i bëri ndonjë kërkesë qeverisë ose kërkoi ndonjë ndryshim të veçantë në politikat qeveritare, e lëre më që ai e bëri këtë me anë të frikësimit ose shtrëngimit”, shkroi Carro në vendimin e tij.
Akuza për vrasje të shkallës së parë që u rrëzua do të kishte sjellë një dënim maksimal me burgim të përjetshëm pa mundësinë e lirimit me kusht.
Nëse dënohet për akuzën e mbetur për vrasje të shkallës së dytë, Mangione përballet me një dënim minimal prej 15 deri në 25 vjet burg. Ai është akuzuar gjithashtu për krime me armë dhe falsifikim.
Dhe përveç procedurave penale të shtetit të Nju Jorkut, Mangione përballet edhe me akuza federale për vrasje, të cilat mund të çojnë në dënimin me vdekje.
Carro e hodhi poshtë kërkesën e ekipit të mbrojtjes për të shtyrë gjyqin shtetëror deri në përfundimin e gjyqit federal të Mangione-s.
Gjatë seancës dëgjimore të së martës, gjyqtari vendosi që seancat gjyqësore do të fillonin më 1 dhjetor.
Mangione është deklaruar i pafajshëm për akuzat kundër tij.
Thompson, baba i dy fëmijëve, ishte drejtori ekzekutiv i divizionit të sigurimeve të UnitedHealth Group – siguruesi më i madh shëndetësor në SHBA. Ai ishte në New York City për një takim kur u qëllua tre herë në një rrugë të ngarkuar në Manhattan rreth orës 6:45 të mëngjesit më 4 dhjetor. Pas një kërkimi pesë-ditor, Mangione u arrestua rreth 480 km larg, në një restorant McDonald’s në Altoona të Pensilvanisë.
Policia tha se ai la një shënim ku kritikonte kompanitë që përfitonin nga sistemi i kujdesit shëndetësor amerikan, duke i akuzuar ato për “korrupsion dhe lakmi”.
Jashtë Gjykatës Supreme të Manhattanit të martën u mblodhën një numër i vogël mbështetësish të Mangione-s, disa prej të cilëve mbanin pankarta me slogane të tilla si “Lironi Luigin” dhe “I pafajshëm derisa të provohet fajësia”.
