Dy teste të shpejta falas në javë për të gjithë në Britaninë e Madhe, për të ndihmuar sa më shumë në luftën kundër Covid-19!
Zgjatja e programit të shqyrtimit anti-Covid është një nga masat që Londra po përgatitet të marrë në funksion të relaksimit të mëtejshëm të kufizimeve, të cilat qytetarët po i zbatojnë prej disa javësh tashmë.
Testet e shpejta do të ofrohen tashmë për studentët, familjet e tyre dhe ata që punojnë jashtë shtëpisë dhe do të jenë në dispozicion për të gjithë nga 9 Prilli, përfshirë në farmaci dhe me postë.
Ideja, shpjegoi Ministri i Shëndetësisë Matt Hancock, është që të përpiqen të shmangin çdo ringjallje të virusit duke lehtësuar izolimin. Ndër masat që duhet të nënshkruhen nga Kryeministri Boris Johnson dhe qeveria e tij, është rihapja e dyqaneve, bareve, pub-eve dhe restoranteve që do të fillojnë të shërbejnë në ambiente të jashtme nga 12 Prilli.
Pas një viti shumë të vështirë, Britania po përgatitet të jetojë “ditë më të ndritura”, premtoi Johnson dje në mesazhin e tij teksa uronte Pashkët në Twitter:
“Ardhja e Pashkëve sjell me vete shpresë të re dhe ky vit, si kurrë më parë, sjell premtimin e ditëve më të ndritura për të gjithë.”- shkroi Johnson.
