Nga dita e djeshme qytetarët e kanë të detyruar të mbajnë maskë ose barrierë mbrojtëse, si në vendet e mbyllura, po ashtu dhe në ambiente të hapura. Mirëpo është vënë re se po ndodh krejt e kundërta, sepse si gjithmonë masat aplikohen me dy standarde.
Në udhëzuesin e ri të Ministrisë së Shëndetësisë thuhej se duhej të mbahej maska edhe në bare e restorante para dhe pasi të konsumohej ushqimi ose pija. Kjo gjë jo vetëm që nuk është zbatuar, por edhe askush nuk është gjobitur, duke e bërë akoma dhe më absurd këtë vendim.
Si është e mundur që një njeri e ka të detyruar të mbajë maskë në rrugë, ndërkohë që në lokal, ku në shumicën e rasteve nuk respektohet distanca fizike, nuk mbahet maska dhe askush nuk gjobitet? Në vendimin e ri të qeverisë thuhej se do të gjobitej me një vlerë prej 3 mijë lekësh të reja çdokush që shihej pa maskë dhe ndërkohë që në rrugë ka kontrolle, për baret dhe restorantet policia bën një sy qorr e një vesh shurdh.
Lokalet vazhdojnë të qetë me muzikën
Të njëtët që marrin vendime, janë të njëjtët që nuk i zbatojnë dhe prandaj çdo gjë ecën mbrapsht në Shqipërinë tonë. Prej kohësh është vendosur që muzika të ndalohet pas orës 20:00 dhe frekuentimi i bareve pas orës 00:00, por për pronarët e shumë lokaleve fati nuk është i njëjtë. Prej kohësh Iconstyle ka ngritur shqetësimin në lidhje me diskriminimin që u bëhet nga efektivët e policisë disa pronarëve për ndalimin e muzikës pas orës 20:00 të darkës.
Për disa subjekte, që ndodhen madje edhe në qendër të Tiranës dhe që luajnë muzikë pas orarit të lejuar, nuk merret asnjë masë, madje makinat e policisë nuk guxojnë të ndalin para dyerve të tyre. Policia e Shtetit duke përfituar edhe nga vakumi ligjor, mungesa e informacionit të subjekteve, por edhe nga qarkoret që lëshohen me pretekstin e koronavirusit, kryen gjobitje dhe bllokime selektive. Ndërkohë goditje të tilla shpesh bëhen me urdhër të vetë Ministrit të Brendshëm, Sandër Lleshaj, i cili tashmë është si një kukull në duart e Edi Ramës. Ndërkohë të tjerët që ruajnë lidhjet e forta me qeverinë, siç ishte rasti i Folie Marine gjatë muajve të verës, vazhdojnë me qetësi aktivitetin me muzikën në maksimum.
Askush nuk i merr më seriozisht vendimet e Edi Ramës
Përveç Sandër Lleshit, që e kanë kuptuar të gjithë çfarë roli ka e si vepron, askush nuk beson më as në vendimet e Edi Ramës. Vetë kryeminsitri nxjerr dekrete që nuk i zbaton dot më dhe fuqia e tij para popullit është zbehur.
Duke e kuptuar dhe vetë që çdo gjë që ka bërë gjatë pandemisë ka qenë e kot, Rama fali gjobat që vendosi para disa muajsh kur ishim në izolim dhe tashmë të gjithë besojnë se do të bëjë të njëjtën gjë edhe për maskat.
Një pjesë e madhe e qytetarëve mendojnë se gjobat nuk do të merren sërish parasysh, duke qenë se kemi përpara edhe zgjedhjet parlamentare dhe Rama do të kërkojë të marrë popullin me të mira për disa vota plus.
Por për sa kohë Rama dhe ministrat e tij, që i përdor si marioneta, janë kaq të papërgjegjshëm dhe nuk mundet as të mbyllin një bar që nuk respekton rregullat, nuk kanë se si të vazhdojnë e të drejtojnë vendin tonë!
