Kris Boyd, një mbrojtës për New York Jets në NFL, është në gjendje kritike pasi u qëllua në bark herët të dielën në mëngjes në Manhattan. Siç raporton BBC, rreth orës 2:00 sipas orës lokale të së dielës në mëngjes, policia mori një telefonatë për një të shtënë jashtë restorantit luksoz Sei Less në qendër të Manhattanit.
Sipas CBS, Departamenti i Policisë së Nju Jorkut po heton incidentin, por nuk ka bërë asnjë arrestim.
“Jemi në dijeni të situatës që përfshin Kris Boyd dhe nuk do të bëjmë asnjë koment të mëtejshëm në këtë kohë”, tha një zëdhënës i Jets për BBC-në.
Policia kohët e fundit publikoi një video që tregon të dyshuarin.
Përpara se t’i bashkohej Jets në fillim të këtij viti, Boyd luajti dy sezone me Houston Texans, e më pas një sezon me Arizona Cardinals dhe katër sezone me Minnesota Vikings. Lojtari i Jets kishte qenë jashtë loje për shkak të një dëmtimi në shpatull që pësoi gjatë një stërvitjeje të ekipit në gusht.
Shoku i tij i skuadrës, Jermaine Johnson, postoi një mesazh në X duke kërkuar lutje për shokun e tij të skuadrës.
“Ju lutem të gjithëve, dërgoni lutjet tuaja për vëllain dhe shokun tim të skuadrës Kris Boyd dhe familjen e tij!!! Zot, të lutem vendos dorën tënde shëruese mbi Kris dhe ktheje atë në shëndet dhe siguri. Zot, të lutem ndihmoje ta kalojë këtë shëndoshë e mirë. Në emrin tënd, Amen.”
