Grupe të ndryshme nga shtetet fqinje dhe ato europiane u treguan menjëherë të gatshme për të ndihmuar Shqipërinë dhe shqiptarët pas tërmetit 6.4 ballë righter që goditi vendin të martën.
“iconstyle.al” sjell një përmbledhje të të gjitha ndihmave që ofruan strukturat e shteteve të huaja për Shqipërinë dhe forcat që u angazhuan në terren:
Kosova:
Kosova ishte ndër shtetet e parë që ndihmuan duke angazhuar skuadrat përkatëse të FSK dhe zjarrfikësit atje. 110 operatorë të specializuar dhe 40 pjestarë të Forcave të Sigurisë së Kosovës të njësive të kërkimit dhe shpëtimit mbërritën në vendin tonë duke u bërë krahët kryesorë në operacionet e shpëtimit.
Italia
Nga Italia mbërriti një njësi kërkim-shpëtimi nga National Firefinghters Corps që ka në përbërje më shumë se 20 specialistë të fushës në kërkime operacionale, asistencë mjeksore dhe inxhinierë. 200 vullnetarë të trajnuar nga Mbrojtja Civile, dhe zjarrfikësit e Vigili Del Fuoco.
Në mesin e tyre ishin edhe partnerët italianë të Welcome Albania që kanë sjellë në Shqipëri një grup të specializuar emergjencash me pajisjet më të fundit për t’u ardhur në ndihmë të prekurve nga tërmeti.
Giuseppe Trisolini nga Tourmake; Vincezio Chimisio, Konsull Nderi i Shqipërisë në Itali; Iv Tase nga Welcome Albania dhe Alketa Elezi nga Dhoma e Ndërmjetësimit; janë angazhuar për të sjellë këtë grup të nevojshëm specialistësh me 4 autoambulanca, dhe 30 vetë staf që është i specializuar në dy fusha, atë të nxjerrjes së njerëzve nga rrënojat dhe mbajtja e tyre në jetë (lexo këtu).
Zvicra
Një ekip me 15 specialistë të mobilizuar nga qeveria zvicerane mbërritën në Shqipëri për të ndihmuar vendin me pasojat e tërmetit më të rëndë. Ekipi përfshin ekspertë në dy fusha: inxhinierë që vlerësojnë gjendjen e ndërtesave dhe ekspertë që vlerësojnë nevojat dhe planifikojnë veprimet në përgjigje të tyre.
Kroacia
Ekipi kroat i kërkimit-shpëtimit përbëhej nga 15 anëtarë të Drejtorisë së Mbrojtjes Civile dhe tetë qen shpëtimi, së bashku me dy helikopterë ushtarakë MOD.
Franca
Tre skuadra që kanë në përbërje 100 efektivë që i përkasin Mbrojtjes Civile, Batalionit të Zjarrfikëseve të Marsejës dhe zjarrëfikës nga jugu i Francës. U dërguan me dy avionë francezë: një Beechcraft super king Air 200 për transport ndihme dhe një cargo Bombardier Dash.
Greqia
Nga Greqia mbërritën dy njësi ekspertë tërmetesh EMAK (Njësia special për menaxhim fatkeqësish) që kanë 40 anëtarë dhe qen kërkim shpëtimi, makineri dhe një avion C-130 me ushqime.
Maqedonia e Veriut
Përpos ndihmës financiare, nga shteti fqinj mbërritën dronë me kamera për kërkimet e të mbijetuarve nën rrënoja. Skuadrat e shpëtimit u angazhuan në terren ashtu sikurse edhe pajisjet e pastrimit të rrënojave. Higjiena komunale-Shkup ndihmoi me shpërndarjen e ndihmave.
Rumania
Dy avionë Alenia C-27 J Spartan, një helicopter, kamionë sikurse edhe një total prej 52 zjarrfikësish IGSU si dhe doktorë dhe infermierë, plus 12 tonë material për kërkim dhe shpëtim duke përfshirë edhe qentë.
Kisha Ortodokse rumune ka lancuar një fushatë mbledhjesh fondesh që në 26 nëntor.
Serbia
Një ekip i specializuar për shpëtim i Ministrisë së Punëve të Brendshme të Serbisë mbërriti në Shqipëri që në orët e para pas tërmetit, ku ndihmuan në operacionet e kërkim-shpëtimit në zonat e prekura.
Turqia
Një ekip i shpëtimit, tre automjete, Ekipi Kombëtar i Shpëtimit Mjekësor dhe një avion i Forcave Ajrore Turke u dërguan në Shqipëri për të ndihmuar në punimet e kërkimit dhe shpëtimit në rajon, pas tërmetit me magnitudë 6,4 ballë.
Shtetet e Bashkuara të Amerikës
Një njësi personeli nga Mbështetja civilo-ushtarake e dislokuar në Kosovë mbërriti në Shqipëri.
Ndërkohë, USAID nisi dje për në Shqipëri ekipe emergjencash nga Departamenti Zjarrfikës dhe Shpëtues i kontesë Fairfax dhe Departamenti Zjarrfikës i kontesë së Los Angeles. Këta ekspertë do të ndihmojnë në koordinimin e ekipeve ndërkombëtare në vlerësimin e dëmeve, për të përcaktuar nëse ndërtesat dhe infrastruktura kritike në zonat e prekura janë të sigurta.
/Iconstyle.al
