Avokati i familjes së gruas që u dhunua në shtëpinë e të moshuarve ‘Orenda’ në Pejë, Meshari Selimaj, ka bërë një reagim së fundmi lidhur me lirimin e 3 infermiereve nga paraburgimi.
Ai ka thënë për Tv Klan se vendimi që u mor për lirimin e infermiereve që dhunuan të moshuarën tregon se besimi në drejtësi është shuar.
“Vendimi i Gjykatës Supreme për lirimin nga paraburgimi i të pandehurave në këtë fazë të procedurës ku akoma nuk ka përfunduar procedura hetimore dhe akoma ekziston rreziku i madh që të ndikohet në ndryshimin dhe asgjësimin e provave, është tregues i qartë se cilat janë tendencat për trajtimin e mëtejshëm të këtij rasti, relativizimi i tij, dhe në fund lirimi nga aktakuza apo shqiptimi i ndonjë dënimi me gjobë. Me ditën e sotme besimi në drejtësi për këtë rast u shua”, theksoi ndër të tjera avokati Meshari Selimaj për tvklan.al.
Kujtojmë se një video me pamje shokuese dhe shqetësuese u bë virale në rrjet, ku infermieret shiheshin se si dhunonin një të moshuar teksa flisnin e qeshnin me njëra-tjetrën.
Menjëherë, pas videos, ato u arrestuan dhe u lanë në paraburgim për 1 muaj.
Lidhur me rastin, reaguan shumë VIP-a shqiptarë të cilët kërkuan drejtësi për gruan e dhunuar.
