Lionel Messi është konfirmuar zyrtarisht si lojtar i Paris St-Germain dhe sot ka mbajtur konferencën për shtyp para gazetarëve. Ai foli për largimin nga Barcelona, transferimin tek ekipi francez dhe objektivat për të ardhmen.
“Gjithçka që më ka ndodhur javën e fundit, ishte e vështirë, e papritur, por në të njëjtën kohë, shumë e shpejtë. Ka shumë entuziazëm. Unë jam shumë i lumtur që jam këtu. Duhet t’i kem asimiluar të gjitha këto ndjenja për një javë. Ne bëmë atë që mundëm”, u shpreh Messi.
PSG po kërkon ende titullin kampion në Champions League dhe Messi u shpreh i bindur se do e arrijnë këtë fitore.
“Qëllimi im dhe ëndrra ime është të fitoj Champions League edhe një herë. Ndjej se klubi është gati të luftojë për të gjithë trofetë. Ky është qëllimi im, dua të vazhdoj të rritem, të fitoj tituj dhe kjo është arsyeja pse erdha në këtë klub”, tha ai.
Gjatë konferencës, Messi nuk harroi të përmendte edhe Barcelonën, skuadrën në të cilën u rrit.
“Para se të largohesha nga Barcelona, u thashë tifozëve: Unë gjithmonë do të jem mirënjohës për dashurinë e treguar. Është shtëpia ime. Kam përjetuar shumë që nga fëmijëria ime. Ata e dinin që unë do të shkoja në një ekip konkurrues sepse jam fitues. Nuk kisha asnjë dyshim se PSG ndau qëllimet e mia. Të shohim nëse takohemi përsëri me Barcelonën”
Përveç tifozëve që prisnin jashtë, as gazetarët nuk e përmbajtën veten nga gëzimi për marrëveshjen e Lionel Messi-t me PSG.
