Historia e Linda Rei bëri bujë në mediat vendase, pasi vendosi të shfaqej për herë të parë në ekranin shqiptar, ku u rrëfye për transformimin e saj nga mashkull në femër. Qysh fëmijë e ndjente veten se kishte një trup të huaj derisa, në moshën e pubertetit, filloi të merrte hormone për ndryshimin e gjinisë dhe vetëm një ditë pasi mbushi 18 vjeçe, iu nënshtrua operacionit për të ndërruar gjininë.
Tashmë Linda i ka treguar publikut edhe lidhjen e saj me djalin e biznesmenit, me të cilin është njohur në Zvicër. Massimo, një djalë me origjinë shqiptare dhe Linda po përjetojnë prej 6 muajsh një romancë. Pak kohë më parë, Massimo i ka propozuar edhe me një unazë shumë të çmuar, që Linda, për fat të keq, nuk e mban në gisht.
Lajmet e ditëve të fundit se çifti mund të jenë në një krizë nuk janë të vërteta, edhe pse Linda pranoi dje te emisioni “Rudina” se jo gjithmonë dashuria është aq e bukur sa të gjithë do të donim, pasi ka pengesat e saj.
E pyetur nga Rudina si po shkon lidhja e saj e dashurisë, ajo tha: “Ka kriza të vogla, kriza të përditshme, xhelozitë e vogla…” , duke e argumentuar këtë me faktin se për Massimo-n është e vështirë të kuptojë gjithçka që ndodh në showbiz kur është jashtë kësaj bote.
“Kur ai është jashtë botës së showbiz-it, është vështirë të kuptojë”, thotë ajo, por nëse do të ndjente se të qenit në këtë fushë do të rrezikonte dashurinë e saj, ajo do të dorëzohej, sepse vëmendja mediatike është krejt e përkohshme dhe nuk ia vlen kurrë që për të të sakrifikosh dashurinë.
Po unaza aq shumë e përfolur e Lindës, pse nuk e mban në gisht?
“Thjesht sepse kam frikë ta mbaj në dorë, është një karat e gjysmë. Jam edhe harraqe…”, u shpreh ajo.
