Një aksident tragjik ajror ka tronditur iranian mbrëmjen e djeshme ndërsa sot janë konfirmuar zyrtarisht viktimat. Mediat vendase raportojnë se Presidenti i Iranit, Ebrahim Raisi ka gjetur vdekjen në një aksident me helikopter.
Bashkë me të në bord ishte edhe ministri i Jashtëm, Hossein Amir Abdollahian; guvernatori i Azerbajxhanit Lindor Malek Rahmati dhe gjeneralmajor Seyed Mehdi Mousavi, kreu i ekipit presidencial të sigurisë. Në avion ka qenë edhe një pilot, një bashkë-pilot dhe një teknik.
Helikopteri me të cilin ata udhëtonin u rrëzua në provincën malore të Iranit të Azerbajxhanit Lindor. Rrënojat e helikopterit janë gjetur, por të gjithë viktimat janë shkrumbuar, pasi mjeti fluturues është djegur në momentin kur është rrëzuar.
Tani postin e Presidentit, e mban zëvendësi i Raisit, Mohammad Mohbar, ndërsa zgjedhjet për presidentin e ri duhet që të mbahen në 50 ditët e ardhshme. Qeveria ka shpallur 5 ditë zie në Iran, duke i cilësuar 8 viktimat, martirë.
Ngjarja ka tronditur liderët nëpër botë të cilët kanë shprehur ngushëllimet për familjarët e Presidentit iranian. Ndërsa paraprakisht dyshohet se shkak për rrëzimin e helikopterit mund të kenë qenë kushtet e këqija atmosferike, hetimet për ngjarjen vazhdojnë.
Përkthyer nga IRNA.
