Letrat e fëmijëve janë ato që duket se na prekin më shumë, nga fjalët e çiltra që i shprehin kaq thjeshtë. Pas fitores së Donald Trump dhe humbjes së Hillary Clinton në zgjedhjet presidenciale në SHBA, të shumët ishin ata që u trishtuan.
Mes tyre duket se ishte edhe kjo 10-vjeçare, e cila me ndihmën e nënës së saj i dërgoi një letër kandidates demokrate për presidente, letër e cila është parë dhe shpërndarë në shumë rrjete sociale.
Ajo quhet Kaia James dhe është e para vajzë e vogël që shkruan një letër të hapur për Clinton. Nëna e saj tregoi se kur e bija u zgjua në mëngjes shpërtheu në lot në shtëpinë e saj në Orlando, Florida.
“Ajo qau për një orë dhe unë e lash të mblidhte veten para se ta dërgoja në shkollë”, tha nëna e saj Sabrina James për “Daily Mail”.
Letra
“E nderuar Hillary Clinton
Faleminderit që garove për mua dhe për të gjitha gratë dhe vajzat.
Femrat mund të bëhen çdo gjë dhe të bëjnë çdo gjë dhe meshkujt nuk janë më të fortë se sa gratë.
Unë mendoj se është mahnitëse fakti që kur ishit në moshën time, ju donit të bëheshit një astronaute, kur të rriteshit – unë, gjithashtu.
Edhe pse ju kurrë nuk u bëtë një astronaute, keni bërë kaq shumë gjëra të pabesueshme.
Unë do të përfundoj atë që ju nisët dhe do të ndryshoj ëndrrën nga të qenit një astronaute, për t’u bërë një lidere botërore.
Ju luftuat për ne dhe tani është radha jonë të luftojmë për ju. Nuk ka mbaruar ende!”.
Burimi: Daily Mail
