Këngëtarja e njohur shqiptare Leonora Jakupi ka ndarë detaje të rralla nga jeta e saj personale, duke folur hapur për lidhjen e saj shumëvjeçare gjatë një interviste të dhënë për emisionin “Weekend” në Klan Kosova. Artistja, e cila prej vitesh është treguar shumë e rezervuar për jetën private, ka zbuluar për herë të parë se është në një lidhje të gjatë prej 15 vitesh, të cilën e përshkroi si një marrëdhënie të qëndrueshme dhe të mbushur me mirëkuptim.
Leonora e cilësoi lidhjen e saj si të fortë dhe të konsoliduar ndër vite, duke theksuar se partneri i saj është një person që i ofron qetësi, mbështetje dhe siguri emocionale. Sipas saj, marrëdhënia është ndërtuar mbi respekt dhe përkrahje të ndërsjellë, elemente që e kanë bërë të zgjasë kaq gjatë.
“Është një dashuri 15-vjeçare, e gjatë, stabile, tek e cila gjej shumë komoditet, shumë rehati dhe përkrahje. Jetojmë bashkë, u bë kohë”, u shpreh këngëtarja.
Ajo shtoi gjithashtu se partneri i saj preferon të qëndrojë larg vëmendjes mediatike dhe nuk ka dëshirë të jetë figurë publike, arsye pse ajo ka zgjedhur ta ruajë privatësinë e marrëdhënies së tyre.
Gjatë intervistës, Leonora ndau edhe një aspekt të ndjeshëm të jetës së saj, duke treguar se mungesa e babait ka ndikuar në vendimet e saj për jetën personale, veçanërisht sa i përket organizimit të një dasme.
