Aktori dhe aktivisti, Leonardo DiCaprio ka reaguar pas shpalljes së lumit Vjosa Park Kombëtar. Ai e quan një ditë historike shpalljen Park Kombëtar Vjosën, ndërsa falënderon të gjithë personat që kontribuuan.
“Sot është bërë historia. Bashkëpunimi mes qeverisë shqiptare, shoqërisë civile dhe biznesit ka krijuar Parkun e parë Kombëtar të Lumit të Egër në Evropë. Lumi Vjosa do të rrjedhë i lirë përgjithmonë, nga burimi në det, për ta shijuar brezat e ardhshëm. Një vizion i ri për ruajtjen globale të ujit është këtu. Urime për të gjithë ata që e bënë realitet këtë përpjekje të mahnitshme”, shkruan Di Caprio.
View this post on Instagram
Vjosa, lumi i fundit i egër në Europë, është shpallur zyrtarisht Park Kombëtar, çfarë do të thotë se nuk do të lejohet asnjë lloj ndërtimi që cënon lumin Vjosa, përfshirë këtu edhe HEC-et që krijuan një debat të madh jo vetëm në Shqipëri, por edhe në arenën ndërkombëtare.
Me vendimin e marrë nga Këshilli i Ministrave, e gjithë sipërfaqja e lumit Vjosa, zona bregore, një pjesë e sipërfaqes tokësore, bashkë me tre degët e lumit Drino, Bënsh, Shushicës është shpallur Park Kombëtar. Sipërfaqja totale e shpallur Park Kombëtar është 12 727 hektarë.
“Shpallim lumin e Vjosës, lumin e fundit të egër në Europë, Park Kombëtar, kategoria e dytë e mbrojtjes që është shumë më e lartë se ajo që kishte një vit më parë si Park Natyror. E kemi shtrirë këtë sipërfaqe mbrojtje në 12 727 ha që është gjithë sipërfaqja ujore, bregore e lumit bashkë me sipërfaqen tokësore që së bashku me të tre degët e lumit Vjosë, Drino, Bënsh, Shushicës, bëjnë atë që duhet atë që është sot parku i parë i një lumi të egër në Europë.”-tha ministrja Mirela Kumbaro.
Ndonëse është shpallur Park Kombëtar, qeveria nuk e ka ende një plan menaxhimi. Sipas studimit që të do të bëhet për zonën, do të përcaktohet zona se ku mund të ngrihen veprimtari ekonomike, ndërsa në pjesët ku cenohet lumi dhe krahët e tij nuk do të lejohet asnjë lloj ndërtimi.
Shpallja e lumit Vjosa si Park Kombëtar ndihmon ruajtjen e një prej lumenjve të fundit të egër të Europës.
