Zgjati kaq pak për të, por shpresojmë që ta ketë shijuar! Vetëm 15 ditë pasi mori detyrën si zëvendësministër i Arsimit dha dorëheqjen sot, Taulant Muka. Ai u emërua në këtë detyrë më 31 tetor, pasi zëvendësoi Ervin Demon, të cilin e akuzoi për plagjiaturë.
Sipas “BalkanWeb” Muka ia dorëzoi dorëheqjen ministres së Arsimit, Lindita Nikolla dhe kryeministrit Edi Rama.
“Për arsye etike, morale dhe profesionale dhe të papajtueshmërisë që unë kam me modelin e punës të aplikuar me Ministrinë e Arsimit, ju paraqes dorhëqjen time të parevokueshme nga posti i zv.ministrit”, thuhet në letrën e dorehëqjes drejtuar Rames.
Ervin Demo dha dorëheqjen më 19 tetor, pasi u akuzua për plagjiaturë nga studiuesi Taulant Muka, që postoi foton e një artikulli të publikuar nga Demo dhe ku rezultoi se një pjesë e konsiderueshme e tij ishte kopjuar nga libri i Janet Morrison.
Sipas Mukës materiali u publikua në vitin 2012 në Revistën shqiptare Social Ekonomike, me bashkautor zëvendësrektorin e Universitetit të Tiranës, Bernard Dosti.
Demo u shpreh pas dorëheqjes kështu: “Çdo argumentim nga ana ime kundër baltosjes në pozicionin që jam sot, do të paragjykohej vetiu dhe do të linte vend për keqinterpretime, nëse unë do të mbetesha në pozicionin tim”.
