Festivali “Sunny Hill” i mbajtur rreth një javë më parë në Prishtinë duket se ka qenë pikënisja e një miqësie e bashkëpunimi tepër interesant mes Ledri Vulës dhe reperit me famë botërore Gashi.
Dy djemtë u panë mjaft të afërt në prapaskenat e festivalit dhe tashmë është zbuluar se Vula dhe Gashi, i cili gjithashtu ka origjinë shqiptare, po bashkëpunojnë për një këngë së bashku dhe kanë nisur xhirimet e klipit.
Kënga e dy reperëve titullohet “That’s Mine” dhe siç është shprehur vetë Gashi, ai e ka shkruar këtë këngë për Kosovën, atdheun e tij.
“Pra kam bërë një këngë për Kosovën të titulluar ‘That’s mine’ dhe unë me Ledrin e xhiruam klipin duke ecur rrugëve të Prishtinës dhe duke u dhuruar akullore dhe para të rinjve, pasi më mbeteshin vetëm pak orë përpara se të nisesha për të xhiruar klipin e këngës ‘Creep on me’.”-ka shkruar Gashi në Instagram. Reperi i famshëm shqiptar prej disa kohësh është bërë pjesë e label-it të reperit dhe producentit Jay Z, të quajtur Roc Nation.
