Ledion Liço i surprizoi të gjithë teksa krejt papritur mbylli të gjitha rrjetet sociale duke shkëputur çdo kontakt me ndjekësit e tij të shumtë. Gjatë kësaj kohe Ledioni ka kaluar një periudhë pushimesh, por në të njëjtën kohë ai zyrtarizoi me martesë edhe dashurinë e tij me Sara Hoxhën.
Mirëpo ndërkohë që të gjithë po presim që çifti të publikojë fotot e ceremonisë së tyre të dasmës, publiku është po aq kurioz të dijë se çfarë programi do të drejtojë Ledioni me nisjen e sezonit të ri televiziv.
I ftuar në emisionin “Thuaje me Pepsi” Ledioni ka folur për herë të parë rreth programit që do të drejtojë gjatë këtij sezoni televiziv. Ai ka hedhur poshtë zërat që përfliteshin se do të prezantojë “Big Brother VIP”, dhe ka zbuluar se edhe këtë sezon do të moderojë spektaklin “The Voice Kids”.
“Nuk do e prezantoj unë ‘Big Brother’. Edhe këtë sezon do jem në ‘The Voice Kids’ dhe besoj se do jetë sezoni i fundit që do e prezantoj këtë program. Viti është i gjatë, mbase do të prezantoj edhe ndonjë program tjetër në të ardhmen”, ka thënë moderatori i njohur.
Gjithashtu Ledioni gjatë këtij emisioni tha se nuk dëshiron t’iu rikthehet rrjeteve sociale, pasi po shijon qetësinë e tij.
“Kurrë mos thuaj kurrë, por unë nuk dua t’i rikthehem rrjeteve sociale. Dua të kem qetësinë time dhe po e shijoj këtë kohë. Mbase nuk do e hap përsëri Instagram-in ose Facebook-un”,-ka treguar Ledioni.
