“Top Albania Radio” festoi më 14 shkurt ditëlindjen e saj të 20-të. Një festë gjigande u organizua nga “Top media” me rastin e këtij përvjetori jubilar.
15 vjet më parë u bë pjesë e Top-it edhe Ledion Liço, i cili e konsideron “Top Albania Radio” si dashurinë e tij të parë. Lidhja me radion për Ledionin është një magji nga e cila ai nuk mund të shkëputet dot. Moderatori vazhdon edhe sot të drejtojë programin “Heineken session”, të cilin e konsideron si programin e tij më të preferuar.
I pyetur gjatë mbrëmjes jubilare të 20-vjetorit të “Top Albania Radio”, për gafën më ta madhe që ka bërë në radio, ai tha se kishte thënë në transmetim një fjalë të pistë.
“Kam thënë një fjalë të pisët. Kam qenë me Xhoi Begën në transmetim në ‘Summer Dance’ dhe kam thënë… Nuk ishte edhe aq fjalë e pisët, por sidoqoftë, nuk thuhet as në radio, as në televizion”, kujton me të qeshur Ledioni.
Pikërisht kjo gafë e kishte trembur për “vdekje” Ledionin aq sa mendoi se ky do të ishte fundi i tij në radio.
“Dhe desh më ra pika, se thashë ‘Ky është fundi im në radio’” , përfundoi duke qeshur Ledioni.
