Pas Justin Bieber, një ikonë e muzikës italiane mund t’u bashkohet fenomenit të momentit, që po tërbon botën me superhitin e tyre, “Despacito”.
Një foto e thjeshtë e një këngëtareje mund të bëhet “sebep” për një bashkëpunim të ri. Diçka e tillë duket se ka ndodhur në një foto të postuar nga Laura Pausini, emër i madh i muzikës italiane.
Ajo publikoi një foto krah Michael Buble, duke thënë se ishte një nga duetet më të mira , që ajo kishte realizuar. Në radhën e pafundme të komenteve u dallua një emër mjaft i njohur, Luis Fonsi, i cili në bashkëpunim me Daddy Yankee realizoi “Despacito”, hitin që ka çmendur këtë verë dhe ka thyer çdo rekord.
Fonsi e ka ngacmuar duke shkruar që “ndoshta doje të thoshe thjesht me një këngëtar kanadez”, fjali e cila ka marrë menjëherë përgjigjen e Laurës. Kjo e fundit ka shkruar fjalinë e shkurtër, por shumë të bujshme: “Më e mira duhet ende të vijë i dashur…me ngadalë… “Despacito”.
Ne themi se duhet një version me një zë femre!
