I kërkuar prej vitit 2016 pas akuzave për trafik droge, Klement Balili i njohur ndryshe me emrin “Eskobari i Ballkanit”, është vetëdorëzuar në polici.
Lajmi është konfirmuar zyrtarisht për ‘News24’ dhe ‘BalkanWeb’ nga gazetarja Klodiana Lala, e cila deklaroi se dorëzimi është konfirmuar nga Prokuroria për Krimet e Rënda.
Deri më tani, mendohet se Balili është shoqëruar tek autoritetet nga familjarët e tij dhe jo nga avokatët Baftjar Rusi dhe Theodhori Sollaku.
Ai është shpallur në kërkim me vendim të Gjykatës së Athinës, që ka caktuar masën e sigurisë “arrest me burg” që prej muajit maj të vitit 2016.
Vetëdorëzimi i tij vjen vetëm pak ditë pasi një burim nga Ministria e Drejtësisë njoftoi se Greqia i është përgjigjur në fund të dhjetorit të kaluar, përmes një letërporosie, kërkesës së Prokurorisë së Krimeve të Rënda, që këmbëngulte t’i dorëzoheshin prova shtesë të 46-vjeçarit.
Kjo letërporosi ishte justifikimi kryesor i Prokurorisë, që në vitin 2018 zgjati tri herë afatin hetimor për Balilin, i etiketuar ndryshe si “Eskobari i Ballkanit”.
Tashmë fati i Balilit mbetet në duart e prokurorisë.
