Një tjetër mjek është ndarë nga jeta pas luftës me koronavirusin.
Hysni Shkjau ka humbur betejën në moshën 69-vjeçare pasi prej ditësh ishte shtruar tek Infektivi.
Ministria e Shëndetësisë bën me dije se Shkjau ishte mjek familjeje në qendrën shëndetësore Qafë-Mali në Bashkinë Fushë-Arrëz të Pukës, me një eksperiencë pune prej 40 vjetësh.
Ai pati vështirësi në frymëmarrje, dhe sipas ministrisë së shëndetësisë vuante dhe nga sëmundje të tjera shoqëruese.
“Ministria e Shëndetësisë njofton me hidhërim të thellë ndarjen nga jeta këtë mëngjes të dr. Hysni Shkjaut, i cili nuk e fitoi dot betejën me virusin e rrezikshëm, megjithë përpjekjet e jashtëzakonshme të stafit të infektivit për kolegun e tyre.
Dr. Hysni Shkjau, 69-vjeçar, me 40 vite eksperiencë, nuk e kishte ndërprerë punën dhe vijonte të shërbente si mjek familje në qendrën shëndetësore Qafë-Mali në Bashkinë Fushë-Arrëz të Pukës. Luftonte prej disa ditësh me COVID19 në spitalin infektiv dhe gjendja e tij u rëndua si pasojë e vështirësisë në frymëmarrje dhe disa sëmundjeve bashkëshoqëruese. Ministria e Shëndetësisë i shpreh ngushëllime famljarëve, miqve dhe kolegëve. Është një humbje e madhe për sistemin shëndetësor, humbja e një mjeku që i ka shërbyer me përkushtim e profesionalizëm për 40 vite komunitetit të tij”, njofton Ministria e Shëndetësisë.
