Netflix ka njoftuar të martën se do të rrisë çmimet e abonimeve në SHBA dhe Kanada pas raportimeve se fitoi 19 milionë anëtarë të rinj në tremujorin e fundit të 2024-ës.
Ky kulm që shënon më të madhin në historinë e Netflix, përforcon vendin e parë të kompanisë në këtë industri pasi ka 302 milionë abonentë në të gjithë botën.
Netflix ia atribuoi suksesin ndeshjes mes Mike Tyson dhe Jake Paul që u organizua në nëntor dhe tërhoqi mbi 108 milionë shikues në të gjithë botën, duke e kthyer në eventin sportiv më të madh të transmetuar. Më pas, Netflix shfaqi dy lojëra të NFL për Krishtlindje që arritën një mesatare prej 30 milionë shikuesish në të gjithë botën.
Abonimet u rritën edhe nga suksesi i sezonit të dytë të serialit “Squid Game”, premiera më e madhe e platformës që tërhoqi 68 milionë shikues në javën e parë. Gjatë këtij muaji, Netflix shtoi transmetimet live të “Raw” nga WWE në çdo të hënë.
Abonimi standard pa reklama ndryshon nga $15.49 në $17.99, ndërsa ai me reklama rritet me $1 duke shkuar në $7.99. Abonimi premium me cilësi 4K ndryshon me $2 duke shkuar në $24.99.
“Ndërsa vazhdojmë të investojmë në programim dhe të sjellim më shumë vlera për abonentët tanë, herë pas here do t’u kërkojmë anëtarëve të paguajnë pak më shumë që ne të investojmë për ta përmirësuar Netflix më tej. Thënë kjo, ne po përshtatim çmimet sot në pjesën më të madhe të abonimeve në SHBA, Kanada, Portugali dhe Argjentinë”.
Netflix i ndryshoi çmimet në tetor të vitit 2023 kur plani Premium shkoi nga $19.99 në $22.99. Këtë vit, platforma pret që të rrisë të ardhurat me 12-14%.
