Ditën e djeshme qeveria i propozoi Kuvendit, zgjatjen e gjendjes së Fatkeqësisë Natyrore, për shkak të COVID-19, deri më 23 qershor 2020.
Komisioni i Ligjeve ndërkohë sapo ka miratuar shtyrjen e gjendjes e Fatkeqësisë Natyrore.
Në një mbledhje të zhvilluar online, ministri për Rindërtimin, Arben Ahmetaj, u shpreh se ky vendim ndihmon në uljen e kurbës së përhapjes së COVID-19.
“Duke qenë se jemi të gjithë te Komisioni juaj të përditësuar me situatën e gjendjes do të na ndihmojë ne që të kemi mundësi të kontrollojmë dhe të fusim në një kurbë ulëse përhapjen e infeksionit”, tha Ahmetaj.
Të vetmit që abstenuan ishin deputetët Alban Zeneli dhe Andi Përmeti, të opozitës së re.
Ndërkohë zv.Ministrja e Shëndetësisë, Mira Rakacolli, tha se është e nevojshme të zgjatet gjendja e fatkeqësisë, pasi me lehtësimin e masave do të ketë një shtim të rasteve pozitive dhe kjo do të ndihmojë për të vendosur në kontroll situatën.
“Situata fatmirësisht deri në këtë situatë është në kontroll. Ka ardhur momenti që të gjykojmë që këto masa të lirohen, por duke qenë se e gjithë merita është pikërisht te këto masa, lirimi i masave, specialistët presin që të ketë raste të shtuara duke qenë se një pjesë e të prekurve janë asimptomatik, prandaj këto masa do të jenë graduale. Duhet që të presim minimumi dy javë që të vlerësojmë nëse do ketë rritje ose jo, dhe nëse do ketë, që gjasat janë po, dhe që të kthehemi sërish aty. kjo do të na ndihmojë për të vazhduar që të kontrollojmë situatën. Është e domosdoshme që të vazhdojmë ta kontrollojmë”, tha Rakacolli.
Zgjatja e shpalljes së gjendjes së Fatkeqësisë Natyrore parashikon vijimin e disa masave për institucionet publike, strukturat operacionale të sistemit të mbrojtjes civile, subjektet private dhe shtetasit shqiptarë.
Kujtojmë se më 24 mars qeveria shqiptare ka shpallur në të gjithë territorin e Republikës së Shqipërisë gjendjen e fatkeqësisë natyrore për shkak të epidemisë së shkaktuar nga COVID-19.
Sipas ligjit në fuqi, gjendja e Fatkeqësisë Natyrore nuk mund të zgjasë më shumë se 30 ditë.
Gjatë kësaj periudhe, qeveria dhe bashkitë kanë detyrim ligjor të kompesojnë të gjithë qytetarët të prekur nga fatkeqësia natyrore. /gazetareforma
