Genci Caci ka ndërruar jetë në spital, si pasojë e plagëve të marra mbrëmjen e djeshme në atentatin në Durrës, ku humbi jetën dhe miku i tij Edison Harizaj.
“Ballkanweb” raporton se edhe përse iu dha ndihma mjekësore, 33-vjeçari ndërroi jetë në spitalin e Traumës, ku ndodhej prej mbrëmjes së kaluar.
Ngjarja e rëndë ndodhi mbrëmjen e kaluar në zonën e plazhit në Durrës, ku nga të shtënat mbeti i vrarë Edison Harizaj dhe Caci mori plagë të rëndë në kokë dhe trup, të cilave nuk mundi t’i mbijetonte dot.
Ata udhëtonin me një automjet tip “audi”, që u qëllua me breshëri automatiku. 39-vjeçari Edison Harizaj ka qenë i skeduar si i përfshirë në disa ngjarje kriminale në vend. Ai ka qenë krahu i djathtë i Emiljano Shullazit dhe ka qenë i dënuar me 10 vite burg për vrasje. Dënim që e kishte përfunduar në vitin 2010. Ai dyshohet se ka kryer një sërë krimesh, përfshi dhe ekzekutimin e gjyqtarit Skerdilajd Konomi.
Burimi: Ballkanweb
