Ju kujtohet kur politikani Gjergj Bojaxhiu ngjiti majën e Everestit? Nuk është çudi ta keni harruar pasi kjo ka ndodhur pesë vite më parë, për 100-Vjetorin e Pavarësisë. Gjergj Bojaxhi mezi arrin të mbajë lotët kur ngjitet në mbi 8800 metra lartësi, kur jep një mesazh për shqiptarët.
Anëtar themelues i Sfida për Shqipërinë vendosi të shpërndante sërish videon në 5-vjetorin e arritjes së tij më të madhe.
“25 maj! 5 vjet nga arritja ime më e lartë: Maja e Everestit. Në video, përpiqesha të ktheja pasionin në fjalë dhe të mbaja lotët”, shkruan Gjergj Bojaxhiu krah videos.
Në përshkrimin rreth vetes në profilin zyrtar të “Facebook”-ut ai shkruan se ka pasion kryesor alpinizmin “dhe kam ngjitur disa nga majat më të larta të botës. Jam krenar që në vitin 2012, për 100-Vjetorin e Pavarësisë, bashkë me pesë alpinistë të tjerë arritëm majën e Everestit”.
“Kam rreth një vit që përgatitem për këtë ngjitje. Dhe arsyeja që e bëmë këtë vit ishte meqë Shqipëria kishte një vit jubile, 100-vjetorin e Pavarësisë. Këtë arritje dhe gjithë mundin ia dedikoj gjithë atyre shqiptarëve, që gjatë këtyre 100 viteve kanë dhënë nga vetja për shoqërinë tonë”, shprehet në video pasi arriti të ngjitej në majën më të lartë në botë.
