Bashkimi i shqiptarëve nga Shqipëria në Kosovë tashmë do të bëhet i mundur edhe me lehtësimin e komunikimit.
Tarifat e romingut ndërmjet Kosovës dhe Shqipërisë, do të hiqen në muajin maj të këtij viti.
Lajmin e ka dhënë koordinatori kombëtar i të dy qeverive, Fatmir Limaj për Radion Evropa e Lirë.
Limaj thotë se heqja e tarifave dhe shumë marrëveshje tjera të arritura më parë ndërmjet Kosovës dhe Shqipërisë, janë në rrugë të mirë të zbatimit.
“Ne, si Kosovë, jemi gati menjëherë ta zbatojmë roaming-un, por besoj që edhe Tirana shumë shpejt përmes vendimit të Qeverisë dhe Parlamentit do ta marrë atë vendim dhe në maj nuk do të kemi problem me romingun, dhe do të zbatohet pastaj është çështja e patentë- shoferëve që pothuajse është kryer. Te çështja e qarkullimit të lirë të qytetarëve, duhet të jemi të kujdesshëm duke respektuar obligimet që kemi me Bashkimin Evropian si dy vende”, thotë Limaj.
Tarifa e roaming-ut me Kosovën është kryesisht dyfish më e lartë sesa ajo që përdoret për telekomunikim brenda një shteti.
Bashkimi Evropian u ka kërkuar të gjitha vendeve të Ballkanit Perëndimor që ta heqin këtë tarifë, si formë lehtësimi për komunikimet ndërmjet qytetarëve.
/REL
