Hillary Clinton hyri në histori si e para grua që zgjidhet zyrtarisht si kandidate për presidente e një prej partive kryesore në Shtetet e Bashkuara. Në mbështetje të saj, Michelle Obama, Zonja e Parë afrikano-amerikane e SHBA-ve, përloti të gjithë qytetarët me fjalimin e saj 15-minutësh, që mbajti të hënën në Konventën e partisë Demokratike.
Michelle e nisi fjalimin duke thënë: “Ndonëse nuk arritëm të ‘thyenim xhamin’ nën të cilin jetojnë vajzat dhe gratë ditët e sotme, gjithsesi arritëm të shkaktonim krisjet nga të cilat tashmë hyn më shumë dritë se kurrë më parë”. Këto ishin të njëjtat fjalë që Hillary përdori 8 vite më parë në fjalimin që mbajti, pasi u mund përballë Presidentit Obama.
“Clinton ka guximin për t’u rikthyer dhe për ta goditur fort atë xham, derisa më në fund ne të gjithë të ndihemi njësoj të lirë dhe të barabartë. Kjo është në fakt historia e këtij kombi, kjo është historia që më ngjiti mua sot në këtë skenë. Zgjedhja e presidentit të parë afrikano-amerikan dhe me shumë mundësi zgjedhja e një gruaje në krye të SHBA-ve, është dëshmia e Amerikës së vërtetë dhe refuzimi i asaj për të cilën Trump lufton. Është një histori e tërë brezash të cilët ndonëse të shtypur dhe të lidhur, arritën të luftonin dhe të bënin atë që duhej bërë në mënyrë që unë, sot, të zgjohem çdo mëngjes në një shtëpi të ndërtuar nga skllevër, në oborret e së cilës vajzat e mia afrikano-amerikane luajnë të lumtura me qentë e tyre”, deklaroi Michelle Obama.
Fjalimi që përloti amerikanët / Michelle Obama… by icon-style
E emocionuar mes thirrjeve mbështetëse të turmës, ajo vazhdoi: “Dhe tani falë Hillary-t, vajzat e mia dhe të gjithë fëmijët tanë e konsiderojnë si të mirëqenë faktin që shumë shpejt Shtëpia e Bardhë mund të drejtohet nga një grua. Kështu mos lejoni askënd të thotë ‘ky vend nuk është i mrekullueshëm’ dhe që do na duhet ta bëjmë të tillë. Sepse Amerika, tani kur ne po flasim është vendi më i mrekullueshëm në botë. Dhe ndërkohë që dy bijat e mia përgatiten për t’u përballur me jetën, unë dua një lider që vlen po aq shumë sa premtimet që unë u ka bërë atyre. Një lider që të udhëhiqet nga dashuria, shpresa dhe arritja e ëndrrave që kemi për fëmijët tanë”.
Zonja e Parë tregoi sfidat që kaloi vite më parë kur bashkëshorti i saj u zgjodh Presidenti i parë afro-amerikan. “Unë dua t’u tregoj fëmijëve që gjuha e urrejtjes që ata shohin përditë në televizor , nuk përfaqëson atë që ky vend është në të vërtetë. Unë dua t’u tregoj që kur dikush i fyen ose i gjuan, ata nuk duhet të bëjnë të njëjtën gjë. Sepse nëse nuk ulemi në nivelin e tyre, atëherë arrijmë të ngremë shumë lart nivelin tonë. Kështu që këtë nëntor, kur të gjithë të shkojmë të votojmë, Hillary do jetë vendimi ynë. Nuk bëhet fjalë as për demokratë e as për republikanë, as për të majtë, e as për të djathtë: Këto zgjedhje dhe ato që do pasojnë kanë fuqinë për të formuar fëmijët tanë dhe jetën e tyre. Ajo që admiroj më shumë rreth Hillary-t është se ajo nuk tërhiqet kurrë kur gjendet përballë vështirësive. Hillary nuk zgjedh kurrë rrugën e shkurtër. Hillary nuk është dorëzuar asnjëherë në jetën e saj. Dhe ky është shembulli i Presidentes që unë dua për fëmijët e mi! Në momentin kur ke në dorë fuqinë e armëve nukleare, nuk mund të marrësh vendime çfarëdo. Duhet të jesh gati dhe i informuar për të bërë më të mirën!”.
Ky fjalim, i cilësuar si një ndër emocionuesit, përloti amerikanët ndërsa rriti mundësinë e Hillary-t për të bërë histori, si Presidentja e parë femër.
We just put the biggest crack in that glass ceiling yet.” —Hillary https://t.co/mYkaLIv861
— Hillary Clinton (@HillaryClinton) July 27, 2016
Burimi: Daily Mail
