Nëse nuk do të ishe i detyruar nga vendndodhja, detyrimet dhe konsideratat financiare, ku saktësisht në botë do të zgjidhje të jetoje dhe të punoje? Sipas Jobseeker, ekziston një vend për të cilin shumica e njerëzve ëndërrojnë kur u bëhet kjo pyetje.
Nëntorin e kaluar, faqja e internetit, e cila përqendrohet në çështjet e punësimit, publikoi një raport që analizonte të dhënat e trendeve sociale për të zbuluar se ku do të donin të punonin njerëzit në mbarë botën nëse do të kishin mundësinë të zhvendoseshin diku tjetër.
“Ka një sërë arsyesh pse njerëzit ëndërrojnë të jetojnë në një vend tjetër, por ndjekja e një karriere mund ta bëjë atë ëndërr realitet”, ndau kompania në një deklaratë për Travel + Leisure në lidhje me studimin e saj.
“Sot, ambiciet dhe karrierat e zgjedhura të njerëzve mund t’i çojnë ata kudo që duan të shkojnë. Globalizimi ka hapur derën për mundësi joshëse pune në të gjithë botën.”
Pas shqyrtimit të të dhënave, u zbulua se destinacioni më i dëshirueshëm për zhvendosje ndërkombëtare është Kanadaja.
Për të gjetur se ku njerëzit donin të zhvendoseshin më shumë, ekipi përdori shabllonin e kërkimit “punë në [emri i vendit]” për të kapur fluksin e kërkuesve të punës në të gjithë botën dhe trendet e tyre të kërkimit.
“Kanadaja është destinacioni më i zgjedhur për zhvendosje midis vendeve të shqyrtuara, duke e bërë atë destinacionin më të popullarizuar për njerëzit që punojnë jashtë vendit të tyre”, shtoi Job Seeker në gjetjet e tij. “Dëshira për të punuar në Kanada është trendi më i spikatur midis kërkuesve të punës në Kosta Rika, Gjermani, Indi, Japoni, Meksikë, Afrikën e Jugut, Arabinë Saudite dhe Emiratet e Bashkuara Arabe.”
Australia u rendit në vendin e dytë, pasi u “zgjedh nga shtatë vende të tjera, përfshirë Danimarkën, Indonezinë dhe Mbretërinë e Bashkuar” . Pas kësaj renditeshin Zvicra, Shtetet e Bashkuara, Singapori, Danimarka, Arabia Saudite, Mbretëria e Bashkuar, Gjermania, Katari dhe Spanja, të cilat plotësojnë dhjetëshen e parë.
